CM Hawla'n Sainik School a hawng ; India khua leh tui ṭha nih tur - CM

India rama Sainik School 27-na, Chhingchhipa din thar chu May 17, Nilaini khan chief minister Lal Thanhawla'n a hawng. CM chuan, Mizote chu India khua leh tui ṭha tak ni turin kan awm tur a nih thu a sawi.

Chief Minister chuan, Sainik School chu sipai luhna atan chauha pawimawh a ni lo tih sawiin, "Khua leh tui ṭha chher chhuahna kawnga pawimawh tak a ni. Sainik School chhuakte hi sipaiah chauh ni lo, kawng hrang hranga ram tan mi thawh hlâwk leh ṭangkai an ni ṭhin. Mizote hi India khua leh tui ṭha tak ni turin kan awmna ramah ṭheuh rinawm takin kan awm tur a ni," a ti.

Lal Thanhawla chuan, rambuai hmain Mizote chu sipaiah officer thleng an tam ṭhin thu sawiin, "Khatih hun lai khan Meitei unaute chuan officer pathum âwrh an nei a, mahse, Sainik School an neih vangin tunah chuan officer za tél an nei tawh," a ti a; Mizote chu rambuai avangin sipai lakah an rilru a hel a, sipaia lut an tlem tial tial phah niin a sawi.

Sipaiah Mizo officer an awm tam theihna atan Sainik School lakah beiseina sang tak an neih thu sawiin CM Hawla chuan, "Hmeichhiate pawh he sikula an luh theih nana kawng ruahman turin Ministry of Defence hnenah rawtna thlen a ni tawh. He sikul hi a changtlun zel nan Mizoram sorkarin theihtawp a chhuah dawn a ni," a ti.

Chief Minister chuan, Sainik School hawn a ni ta chu Mizoram hmasawnna atan méllung pawimawh tak a nih thu sawiin, "Hmasawnna hna hrang hrangah kuttling loa sum lak pawi sa lo leh chutiang tumte'n harsatna an siam ṭhin lai a, sikul sak a nih theih nana a thlawna ram petu Chhingchhipa chhungkua 60-te chungah sorkar leh mipuite aiawhin lawmthu ka sawi a, lawmthu kan sawi bâng lo a ni," a ti. CM hian chhungkaw 60 hnenah chawimawina thuziak a hlan nghal.

Home minister R Lalzirliana pawhin thu sawiin, sikul sakna atana ram petute hnenah lawmthu a sawi a, "Hun lo kal zel turah Sainik School hian sipai officer ṭha tak tak leh ram tana mi chhenfakawm leh ṭangkaite a chher chhuah ka beisei. Sainik School hi Mizoramin kan mumang neih, a taka lo thleng a ni," a ti.

Sainik School hawnnaah hian minister H Rohluna, parliamentary secretary Lt.Col. ZS Zuala leh Joseph Lalhimpuia, MLA pahnih John Siamkunga leh Lalrinawma bakah, official eng emaw zat an tel.

Sainik School thar hi India rama Sainik School 27-na a ni a, India hmarchhak bikah palina a ni. Sikul sakna atan Chhingchhipa chhungkaw 60-in zangnadawmna beisei loin ram hectare 212 vela zau an pe a, March 2012-ah sak ṭan niin, March 2017-ah peih thawkhat a ni.

Building ṭhenkhat la sak mek awm mah se, building tam zawkte chu sak zawha tawh a nih vang te, Sainik School Society-in hmunhmate an endik hnua academic session ṭan theiha an ngaih avang leh, Ministry of Defence-in ṭan phalna an pek vangtein kumin academic session 2017-18 ah zirlai (cadet) pawl 6 zir turin naupang 60 thlan a ni.

Tun dinhmunah principal Major Varun Bajpal hoin zirtirtu paruk leh thawktu dang 13 an awm mek.