CSS hnuaia Hmalak dan tur thlirho

Aizawl District Deve­lopment Coordination & Monitoring Committee chu nimin khan Lok Sabha MP CL Ruala hoin Secretariat conference hall-ah an ṭhukhawm a; Centrally sponsored scheme (CSS) hnuaia hmalak dan tur an thlir.

CL Ruala chuan mee­ting koh chhan sawiin, "Kumin sorkar kum chhunga Aizawl district chhunga CSS hrang hrang 20 chuanga hmalak dan tur ruahmanna thlirin, kum kal taa hnathawh thlir letna neih tur a ni," a ti.

Aizawl DC Kanan Gopinathan chuan, Aizawl district-a hlawh­tlinnate a tarlang a; ODF-a puan theih a nih tawh thu te, Theihai Luia lei dawh zawh a nih thu te, Energy Efficiency Ser­vices Limited (EESL) nena ṭangkawpin North Khawlek, Daido leh NE Tlangnuamah LED light bulb pek an nih thute leh Darlawn khuaah ATM booth hawn thar a nih thute a sawi.

Meeting-a tarlan dan­in, MGNREGA hnuai­ah sorkar laipui leh state aṭangin fund cheng nuai 1,276.92 hmuh a ni a, a vaiin hnathawh nan hman zawh vek a ni.

IAY/PMAY-G ah tun quarter chhung hian cheng nuai 55.95 dawn a ni a, chuta ṭang chuan cheng nuai 55.032 (98%) chu Aizawl district chhungah in 70 sak ṭan­puina atan hman a ni.

Integrated Watershed Management Programme (IWMP) hnuaiah tun quarter chhung vêkin cheng nuai 694.1501 hmuh a ni a, cheng nuai 286.46738 chu hna thawh nan hman a ni.