Engineer-te'n khawmpui an hmang

Mizoram Engineering Service Association (MESA) chuan, nimin khan Berawtlanga Tou­rism Complex-ah inkhawmpui an hmang a; an hun hmanpuitu, chief minister Lal Than­hawla chuan, Mizote'n mipuite mamawh phuhrutu sorkar an mamawh thu a sawi.

Chief Minister chuan, sorkar a kal ṭhat theihna atan a hnuaia thawkte leh a fawng vuantu tan langtlang taka hna thawh a pawimawh thu a sawi a, "Mipui mamawh phuhru a, an tana ding leh engkim an sawi ngamna ‘people friendly’ sorkar kan ma­mawh a, chumi atan chuan sorkar leh mipuiah sor­kar hnathawkte hi in accountable a ni tih hi in hriat nawn fo a ṭha," a ti.

Mizoramah company emaw, industry emaw, mi tam tak eizawnna pe thei sawi tham a awm lo tih sawiin CM Hawla chuan, "Sorkar tih loh chu hna petu leh siamtu lian a awm lo a, chuvangin, kan pawm emaw, pawm lo emaw, sorkar hnathawkte hi vohbik in ni," a ti a; sorkar hnathawkte'n sorkar apiang inhawng taka an thawhpui chu democracy phût a nih thu a sawi.

Lal Thanhawla chuan, sorkar hnathawk zingah tih tak zeta ram leh hmasawnna atana thawh tum leh an hlawh phu bâka thawh tumna nei an awm thu sawiin, "Heng mite hi an pute leh senior-te'n in phûrpui a pawimawh a, an thiamnate hi a nih dan tur ang taka chhawr a nih theih nan an ngaihtuahna leh tumnate hi kan tihlawhtlinsak theih bakah, nasa zawkin hma kan sawn theih ka ring," a ti.

MESA inkhawmpui hi an president Vanlal Tlana'n a kaihruai a, general secretary Lal­ropuia'n an pawl hma­lakna leh hnathawhte a sawi a; an member pension-te thlahna leh thite sûnna hun an hmang. MESA-ah hian member 377 an awm a, chu'ng zinga 44 chu associate member an ni.