Loneitute tan training buatsaih

Mizoram University (MZU)-a Social Works department leh Krishi Vigyan Kendra (KVK), Selesihte chuan, nimin khan Sihphir V/C House-ah 'Capacity building and training for farmers’ an buatsaih a, Social Welfare minister PC Lalthanliana’n a hmanpui.

PC Lalthanliana chuan, awmze neia hnathawh leh mahni dinhmun dik tak hriat chian chu hmasawnna bul a nih thu sawiin, "Mahni ngaihdana kal mai loin, a thiam zawkte thuràwn leh zirtirnate zawm a finthlak a, tunlai thiamna hmang ṭangkai thei turin training ṭha tak neih a tul hle. Training hmang ṭangkai apiang an dingchang ṭhin," a ti.

Mizorama cheng mipui tam zawk kuthnathawktu an nih avangin ram sum leh pai, hmasawnna leh kal zel dan tur an chungah a innghat thui hle tih sawiin Social Welfare Minister chuan, "Sorkara beisei nei reng chunga hnathawh loh tur," a ti a, sorkar chuan a ṭul leh tanpui ngaih chinah chuan a tihtur a ti mai tur thu a sawi.

Training-ah hian lo­nei­tute chu 'Precaution and safety handling of Agricul­tural chemical’ tih leh ‘Soil sampling procedure’ tih thu­pui hmangin zirtir an ni.