International Museum Day hman a ni

Art & Culture depart­ment chuan, nimin khan Mizoram State Museum-ah International Museum Day an hmang a, chief secretary Lalmal­sawma khuallian a ni.

Lalmalsawma chuan thu sawiin, pi leh pute sûlhnû hlut chu hnam changkang zia a nih thu a sawi a, "Mizote pawhin hlutsak zel nachang kan hriat a pawimawh," a ti.

Museum Day hawnna inkhawm zawhah Mizo hnam nunphungte hum-halh leh vawn nun kawnga hmasawn dan tur sawiho a ni.

International Council of Mu­seums (ICOM) chuan May 18 hi International Museum Day atan kum 1977-ah a puang a, ICOM hnuaia museum 35,000 chuangin khawvel hmun hrang hrangah Day hi an hmang. Mizoramah chuan kum 2005 aṭangin hman ṭan a ni a, kumina thupui chu 'Museums and contested histories: Saying the unspeakable in museums' tih a ni.

Mizoram State Museum-ah hian gallery paruk a awm a, chungte chu - Zoology, History & Mineral Gallery, Anthropology, Ethnology, Textile leh Archaeology gallery-te a ni. Thil hluii pholanna (showcase) 107 awmin, thil (object) hrang hrang 768 pho chhuah mek a ni. Kum 2016-17 chhungin mi 10,147-in an tlawh.

State Museum en man hi nau­pang tan Rs. 10 leh puitling tan Rs. 20 a ni a; sikul naupang zirtirtu nena ente chu a man chanvea tihhniam sak an nih bakah, kum 65 chin chung lam tan en man a awm lo. International Museum Day pual hian en man awm loa hawn a ni.