KHAWTHLIR

CM pian champha
Vawiin, May 19 hi chief minister Lal Thanhawla pian champha a ni. Sorkar record-a a lan dan chuan, Lal Thanhawla hi May 19, 1942-ah Synod Hospital-ah a piang a, a pa chu Hmartawnphunga a ni. Kum 1978, 1979, 1984, 1987, 1989, 1993, 2003, 2008 leh 2013-ahte MLA-ah thlan tlin a ni.

NEICCYA khawmpui
Vawin aṭanga May 21, 2017 thleng khian Diwon Presbyterian Church, Meghalaya-ah North East India Christian Council Youth Assembly (NEICCYA) Bienniel Conference vawi 17-na neih a ni dawn a, Mizoram aṭang tel tur mi eng emaw zatte chuan nizan khan Aizawl an chhuahsan. Inkhawmpui thupui chu 'Dare to stand alone' tih a ni.

Thisen pe
Mizo zinga a vawi khatna atana David Zohmangaiha, Republic Veng-in May 18, 2013-a khawvela tlang sang ber, Mount Everest a làwn chhuah champha pualin David Zohmangaiha leh adventure club hrang hranga mi parukte'n nimin khan Aizawl Civil Hospital-ah thisen an pe a; a petu zingah Mt. Everest-a lawn chhuak dang Lalrintluangi pawh a tel. Adventure club-te hian Mt. Everest làwn chhuah hmasak ber champhaah thisen an pe ṭhin a ni.

Meizial man
Serchhipa Legal Metrology enforcement, Anti Tobacco Squad leh Food and Drugs Administration-te chuan, May 17, Nilaini khan joint operation an nei a, Serchhip khawpuia wholesale, retail outlet leh vendor-te endikin, dan phal loha ram dang meizial lak luh leh Gutkha product Rs. 66,710 vel hû an man.

Zirlai chawimawi
Lunglei SP office chuan nimin khan Lunglei district aṭanga kumin HSLC exam-a tiṭhate chawimawina hun, SP office conference hall-ah an buatsaih. Chawimawina hun hi addl. SP J Lalmuankima'n a kaihruai a, SP C Lalruaia'n zirlai tiṭhate fuihna thu a sawi.