Nurse leh H/W-te NRTS chungchang zirtir

Mizoram Nursing Council (MNC) chuan nimin khan Aizawl Civil Hospital (ACH) Conference Hall-ah nurse leh health worker-te tan training an buatsaih a, Health principal director Dr F Lallianhlira'n hmanpuiin, Nurses Registration and Tracking System (NRTS) chungchang an zirho.

Dr F Lallianhlira chuan, nurse leh health worker-te chu mipui hriselna kawnga thawktu pawimawh tak ani tih sawiin, an dinhmun hre chiang a, an hnaa lungawina nei chunga an mawhphurhnate hlen turin a fuih a; an thlen china duhtâwk mai lo a, hmasawnna kawng dapa intuaithar zel turin a chah.

'Inservice training for nurses and ANM/health workers' ah hian MNC president Lalbiaksangi'n training buatsaih chhante a sawi a; Zochuanpuii'n Indian Nursing Council-in registration system thar a buatsaih, Nurses Registration and Tracking System chungchang a sawifiah.

Training-ah hian private hospital hrang hranga nurse-te leh Aizawl district chhunga health worker-te mi 260 an tel a; vawiinah chhunzawm a ni ang.

Indian Nursing Council chuan NRTS a duang thar a; nurse, health worker, health supervisor, community health officer leh midwife zawng zawngte chu an registration tihnun tharna (renew) turin kum nga chhunga intuaitharna (inservice training) darkar 150 tal nei turin a ti a ni.

NRTS aṭang hian awlsam leh felfai zawkin registration a tih theih tawh dawn a, India ram chhung khawi hmuna thawk duh tan pawh thil a tiawlsam zual dawn niin an sawi. NRTS atana mamawh, electronic hmanraw pawimawhte pawh MNC kutah a awm tawh a, kalpui ṭan thuai a ni dawn tih an sawi bawk.