Lunglei district-a hriselna kawnga hmalaknate thlirho

Lunglei District Health Committee chu nimin khan an chairman Lal-zarmawii, Lunglei DC hoin a pisaah an ṭhu a; hriselna lama Lunglei district-a hmalakna hrang hrangte an thlir.

Meeting-ah hian Lunglei SMO Dr Lalawmpuia Chhangte-in Intensified Diarrhoea Control Fortnight (IDCF) thil tum leh hmalakna te, hmachhawp hrang hrangte a sawi a; family planning-a nu nau thei tawh lo tura insiam chungchang leh nu naupaite a thlawna inenkawlna kawnga sorkar laipui hmalakna, Pradhan Mantri Surakshit Matritva Abhiyan (PMSMA) kalpui dante a sawi bawk.

IDCF puala June 12-24, 2017 chhunga hun hman dan tur sawiho a ni a, June 13-ah Baptist Higher Secondary School junior section-ah hman tura ruahman a ni. Hriselna kawnga sorkar laipui hmalaknaah private hospital-te nen ṭangruala nasa zawka thawkho turin ṭan lak ni se, an ti.