Biate-ah thingpui her a pung zel

Biate khuaa thingpui chingtute chuan kum tin thingpui an hralh zat a pung zel a, an khuaa thingpui herna khawl, Samuel Tea Factory-ah pawh thingpui an leisak zat leh an her chhuah zat pawh a pung. Thingpui chingtu ṭhenkhat chuan thingpui huan neih chu lo neih aiin a hlâwk zawk thu Vanglaini palai an hrilh.

Samuel Tea Factory neitu Lalthanpuia sawi danin, kum 2015 khan thingpui zîk kg. 69,247 an lei a, chu chu Rs. 27,69,000 man a ni. Kum 2016 khan kg. 86,437 leiin, Rs. 34,57,420 man a ni a; kuminah April 7 aṭanga May 13 thleng khan kg. 54,430 lei tawhin, chu chu Rs. 8,16,450 man a ni.

Thingpui hi April thla aṭanga November thla thleng vel an sik ṭhin a; kum 2015 aṭang khan kg. khat Rs. 15-in an leisak ṭhin a, a hma chuan kg. khat Rs. 12-in an lei thung. Kum dangah chuan thingpui zîk hi ni khatah quintal 4-te an lei a, a tlem chángin qtl. 2-te an lei ṭhin. Kuminah chuan ni khatah qtl. 28-te an lei ṭhin a ni.

Thingpui huan neite chuan, thingpui sih chu lo neih aiin a hlâwk tawh zawk niin an sawi. Biate V/C president RV Hluna chuan, kuminah hian in 100 velin ṭîn khat hmun vel lo an nei niin a sawi a, an chhungkua chu lo neia eizawng kumkhua an nih thu leh thingpui vangin lo an nei tâk loh thu sawiin, "Lo neih nena khaikhin chuan, mahni rau rauah rilru a hahdam ta deuh," a ti.

Thingpui huan enkawltu H Mal-sawm­thanga chuan, "Lo neih nen tehkhin ta ila, ṭhál vawi khata kan sih hi buh ṭín 100 thar nen a inang vel a, kum khatah vawi 3/4-te sih theih reng a nih avangin lo neih aiin a ṭha hle a ni," a ti. Chutih rualin, thingpui zîk a chawr ṭhat leh ṭhat lohin a hril tih sawiin, an thingpui huan chu buh ṭín nga hmun vela zau a ni a, ni khatah kg. 40 (Rs. 600 man) vel an sih hman thu leh a ṭhat loh cháng chuan ni khatah kg. 25-30 an sih thu a sawi.

C Chawngzika chuan, thingpui hralhna a awm avangin thingpui huan enkawltute zingah lo nei peih an awm meuh tawh lo nia sawiin, "Lo neih aiin a hlâwk a ni ang, huan enkawltute zing­ah lo nei peih kan awm meuh lo," a ti a; thingpui buaipui an pun zel avangin factory lamin an hneh meuh loh thu leh khawl neitute dinhmun erawh an hriatthiampui hlea a hriat thu a sawi.

Biate V/C secretary leh Tea Society secretary HVL Sawma chuan, thingpui zik chu sikul zirtirtute pawhin inhlawha an sih ṭhin thu a sawi. Biate HSS-a zirlai pakhat chuan, sikul chawlh ni leh Inrinniah an inhlawh ṭhin tih sawiin, ni khatah kg. 40 (Rs. 600 man)-te an sih theih thu a sawi a, "Lehkha zirna atan ṭangkaiah kan intum thei a, kan hman bâng chu chhungkuaah kan pe ṭhin," a ti.