MZU-ah Varsity Platform 2017 Political party tin aiawhte'n thu an sawi
Mizoram University Students Discussion Forum (MZUSDF) leh Vanglaini bultumin, nimin khan MZU Auditorium-ah Varsity Platform 2017 neih a ni. Political party hrang hrang aiawhte'n an party-in Mizoram kaihhruai an tum dante an sawi bakah, zirlaite aṭanga zawhnate an chháng.
Varsity Platform-ah hian Congress party aiawhin minister Zodintluanga (Congress Legislature Party treasurer), MNF aiawihin vice president Dr R Lalthangliana, ZNP aiawhin president Lalduhoma, MPC aiawhin vice president Vanlalhlana leh BJP aiawhin president Dr JV Hluna ten thu an sawi.
Keynote address sawitu K Sapdanga chuan, khawvel ram dangte el phâk turin Mizo ṭhalaite'n theihna an nei sang tâwk tih a sawi a, "Mizoramin hma a sawn theihna tura a mamawh chu a ngaihna hria hruaitu a ni. Hruaitu hmasate hnathawh ṭhat chhunzawmsak nachang kan hriat hunah hma kan sawn ang," a ti.
Congress party aiawh
Congress party aiawha tel minister Zodintluanga chuan, Congress sorkar chhungin sorkar leibá a chanveah a tlakhniam tawh thu leh Mizoram state economy ṭhannain India ram pum ṭhanna a khûm thu sawiin, chu chu Congress kaihhruai sorkar ṭan lakna vang a nih thu a sawi.
Zodintluanga chuan, sorkar policy thar NEDP hnuaiah Entrepreneurship Development Scheme (EDS) duan a nih thu leh MZU auditorium-ah hawn a nih thu sawiin, "Ṭhalaite tan kalpui mek a ni. Indian Institute of Management, Kolkata-a professor pahnihte pawhin state puala EDS kan nei hi an lawm em avangin thawhpuiah Mizoram sorkar a rawn sáwm a ni," a ti.
MNF Vice President
MNF vice president Dr R Lalthangliana chuan, an party policy thar SEDP chungchang sawiin, "SEDP hi sem ringawt a ni lo a, ṭanpui ngaite an mamawh dan kan endik hmasa ang," a ti a; SEDP-in a tum ber chu ei leh bara intodelh bakah, vantlang nun ṭha neih a nih thu a sawi.
MNF an sorkar a nih chuan Assam Rifles chu Aizawl khawpui chhung aṭangin a rang thei ang bera an sawn chhuah tur thu a sawi a; an chhuahsan ram chu a vaiin mipui tana hman tur a nih thu a sawi bawk.
MPC Vice President
MPC vice president Vanlalhlana chuan, an party hruaitu hmasa Brig. T Sailo hmahtlir chu chhawm nun a, Six Basic Needs tihhlawhtlin an tum thu a sawi a, "India ramah kawlphetha siamchhuak tlem ber kan ni hi a zahthlak hle. Ram hruaitu zingah ram tana ṭha tur hre reng chunga thutlukna dik siam ngam an awm lo hi a pawi. Kan ramin a mamawh chu huaisen taka thutlukna siam ngam a ni," a ti.
ZNP President
ZNP president Lalduhoma chuan, kum 2018 inthlanah ZNP an chak chuan mipui sorkar din an tiam tih sawiin, "Chief Minister kaihhruaina hnuaiah sorkar hmalakna chi hrang hrang enpuia viltu tur Monitoring Committee din a ni ang a, chutah chuan party tin leh NGO te, kohhran tin leh zirlai pawl aiawhte inzat ṭheuhin member an ni ang. Ruling party thu ringawtin sorkar a kal dawn tawh lo a, mipui sorkar a lo ni tawh zawk dawn a ni," a ti.
BPL zir chiangtu, Tendulkar Committee-in India ramah chawhrualin kum tin BPL 7.4%-in an tlahniama a hmuh laiin, Mizoramah chuan 5.7%-in a pung zel zawk tih sawiin, Duhoma chuan, "Sem policy hi kan
ṭhatpui loh bakah kan moral a tichhe tawh hle. Pathian programme meuh pawh kan hlawhchhampui ta. Mirethei retheihna denchhena vote zawn nana sorkar sum hmang a, an duhthlanna leh zalenna chhuhsakna policy ang hi chu zuar tawh lo turin party tin ka ngen a ni," a ti a; an la ti dawn a nih pawhin beneficiary thlangtu tur khawtlang huapzo Selection Board din turin a ngen.
BJP President
BJP president JV Hluna chuan, sorkarna an siam a nih chuan ei leh bara intodelh chu an ngaih pawimawh hmasak tur a nih thu a sawi a, "Rilṭám a huaisen theih loh a, kan huai theih nan chawa kan intodelh a ngai," a ti a; mi tinin tui thianghlim an mamawh tâwk an hmuh theih nan a mamawhte hnenah tuizem an sem tur thu a sawi.