CBI an koh luh loh chuan nasa takin Kan bei zui dawn - MNF President
MNF president Zoramthanga chuan, Mizoram Lottery-a sum tam tham tak hloh leh Mizo Carbon Product kalpui dana thil dik lo awm nia sawite CBI chhuitir turin MNF-in chief minister Lal Thanhawla an ngen tawh tih sawiin, "CBI a koh luh loh chuan nasa takin kan bei zui dawn," a ti.
Nimina Mizo Hnam Runa inkhawmah thu sawiin Zoramthanga chuan, "Lottery sum vbc. 11,808.77 hloh leh Zo Carbon Pvt.Ltd. hminga dik lo taka CTS leh CCIS Rs. 3,41,65,086 chhui chiang tura CBI ko lut turin Chief Minister Office-ah dilna thehluh a ni. Engtin nge a tih dawn tih hi Mizoram mipuiin kan ngaichang ṭhuap a ni," a ti a; CM-in CBI a chhuitir loh chuan total bandh emaw, picketing emawa na taka nawr zui inring turin mipui a chah.
Zoramthanga chuan, Lottery sum chungchang chu chhui awlsam tak tur a nih thu sawiin,, "Comptroller & Auditor General of India-in an report-ah chiang takin an ziak lut tawh," a ti.
Zo Cabon chung-changah, "Sum dik lo taka lak hi an lak chhuahna lamah truck lian, Khleriat leh Mizoram inkara ni hnih vel an thang ṭhinnaah ni khata vawi 5/6 phur thleng anga an ziakte hian dawt a nih chianzia a tichiang nghal a ni," a ti.
CM Lal Thanhawla'n May 12, 2017-a Congress Bhavan-a a thusawiah, CBI ko luta chhuitir tur leh harsatna an neih chuan a lo ṭanpui tur thu a sawi tawh tih sawiin MNF President chuan, "A duh ang ngeiin dilna kan siam a, a hnenah kan thehlut tawh a, a ko lut mai tur a ni," a ti a; Congress sorkar hotute chu anmahni thang kamah an âwk ṭhin niin a sawi.