Internal mark-ah siamṭhat ngai a awm chuan kan siam ṭha zel ang - Education Minister

Kumin HSLC leh HSSLC exam-a pakhatnate chu nimin khan Vanapa Hall-ah Chief Minister's Award hlan an ni. Hlanna inkhawm­a khuallian, School Education minister H Rohluna chuan, internal mark pek danah siamṭhat ngai lai a awm chuan siamṭhat zel a nih tur thu a sawi.

School Education Minister chuan, kumin HSLC-a hman ṭan, internal mark pek chu a vawi khatna ni mah se, MBSE hotute nen an thlirho hnuah ṭha thawkhata an hriat thu a sawi a, "Kumin atangin pawl 11 leh 12-ah pawh hman ṭan tum a ni. Internal mark pek danah hian inkaihhruaina ṭha tak siam a ni a, siamṭhat ngai lai a awm chuan siamṭhat zel a ni ang," a ti.

H Rohluna chuan, zirna chu hnam hmasawnna atana lungphûm pawimawh ber a ni tih hriain sorkar­in a ngai pawimawh hle tih sawiin, "Kan thlen chin aṭangin nasa takin hma kan sawn a, hmasawn zel tur erawh kan ni," a ti a; Aizawl leh Lunglei DIET-ah B.Ed zirna hawn tum a nih thu leh, National Council for Teacher Education (NCTE) pawmpuina pawh hmuh a ni tawh thu a sawi.

Parliamentary secretary (School Education) Joseph Lalhimpuia pawhin thu sawiin, zirlai hlawhtling tharte chu intlansiakna bul an ṭan chauh tih hria a, a tawp tlan thleng ngei turin a fuih a, "Zirlaibu piah lamah internet aṭanga engkim hmuh theih tawhna khawvelah remchanna lei zel a, thil ṭha lo erawh hnâwl ngam a pawimawh," a ti.

Kumin HSLC-ah hian Lal­dintluanga, s/o Lalengthanga, Marian High School, Serchhip chu pakhatna a ni a; HSSLC-ah Science stream-ah Zomuansangi, d/o Zothansanga, St. Paul's HSS, Arts-ah Lalrinzuali d/o Lalzahawma Chinzah, Home Mission School, Commerce-ah Joseph Vanlalrema, s/o Jacob Pahlira, Oikos HSS leh Vocational-ah R Zosangpuii d/o Zorinmawia, Mamawii HSS-te pakhatna an ni.

HSLC leh HSSLC topper-te hnena Chief Minister's Award hlan ṭhin hi kum 2013 aṭangin ṭan a ni a, kum 2016-ah scheme mumal zawka siamin, Mizoram Chief Minister's Award to Toppers of HSLC & HSSLC Examination under MBSE Scheme tia vuahin November 8, 2016-ah notification tihchhuah a ni. Award hian citation leh Rs. 50,000 zel a keng.