BSF hotuin ramri ven dan a enfiah

Mizoram leh Cachar frontier bialtu Border Security Force (BSF) inspector general NS Jamwal chuan, nimin khan Tlabung leh a chhehvel ramria vênhim hna thawh dan a enfiah.

NS Jamwal chuan, ramri vênhim chu BSF-te tih tur lian ber a nih rualin, ramria mipuite rawngbàwl hna an ngaihthah thiang lo tih sawiin, "Ram mipuite rawng bàwl tura awm kan ni," a ti a; BSF sipaite chu ramri bul hnaia chêngte thlamuantu an nih bakah, hma an sâwn theihna tura mawhphurhna pawimawh tak chelhtu an nih thu a sawi.

NS Jamwal chuan, Tlabunga ṭhalai leh hna zawng rualte'n eizawnna tlâka computer an thiam theih nan an zirna tur ngaihtuahsak an tum thu a sawi a; ṭhalaite tun aia an intodelh theihna tur­in kawng hrang hranga theih­tawp chhuahpui an tum thu a sawi bawk.

Tlabung chu India leh Bangladesh inrina ramri bula awm hnam hrang hrangte chênna ni mah se, boruak a rálmuang hlea a hriat thu sawiin BSF IG chuan, "Hetianga boruak rálmuanna leh mipui himna hmun dang hi a váng hle a ni," a ti.

Mizorama inkhuar BSF battalion pahnih - 99 battalion leh 166 battalion-te chu tun hnai khan hmun dangah an vaia sawn chhuah an ni a, battalion pahnih dang - 1 battalion leh 159 battalion-te'n an thlâk a ni.

Tlabung tlawhtu BSF IG NS Jamwal hi 159 BSF commandant LS Dahiya-a'n a lo dawngsawng a, DIG pahnih - A Asthania leh Akhileshwar ten an ṭawiawm a ni.