DC-in warning signboard CYMA hnenah hlan

Aizawl DC Kannan Gopinathan chuan, nimin khan tui tlak hlauhawmna hmuna tàr tur vaukhanna thuziak (warning signboard) panga leh a phunna senso tur Rs. 10,000 chu Central YMA hnenah a hlan.

Kannan Gopinathan chuan, warning signboard tàrna tur hmunte chu chetsualna thlen fona ṭhinte a nih thu sawiin, signboard chu tàr a nih hunah mipuiin ngai pawimawh turin a ngen.

Aizawl District Disaster Management Authority leh Central YMA ṭang­kawp chuan, chetsualna thlen tam zualna hmuna warning signboard tàr ni se, tiin thutlukna an lo siam tawh a; a thawhkhatna atan hmun panga, Tui­rial - Khumtung kai, Reiek kai, Sihhmui kai, Sairang-Tlawng kai leh Tuirial lei bulahte târ a ni ang.