MADC-a MNF thawhpui remtih loh thu Congress President-in a sawi nawn ; MDC palite chungah action lak a ni lo

Mizoram Pradesh Congress Committee president Lalsawta chuan, Mara Autonomous District Council (MADC)-a Congress MDC palite'n MNF thawhpuia sorkarna an siam chu MPCC PAC-in a remtih loh a nih thu leh PAC chu a dinna ngai rengah a la din thu a sawi. Hetih lai hian, MADC-a Congress MDC palite chu hrem an ni lo.

Nimina Congress Bhavan-a inkhawmah thu sawiin Lalsawta chuan MADC chungchanga MPCC PAC thutlukna a puang a, "July 12, 2022-a PAC meeting chuan Disciplinary Action Committee-in a zirchianna leh ṭul ang ang a rawn thehluh kan sawiho. MADC-a Congress MDC palite'n Congress led government siama MNF an thawhpui hi PAC-in a remtih loh a nih avangin PAC hi kan dinna a la ngai reng a ni," a ti.

Lalsawta chuan, MNF leh BJP-te chuan belh khawmin MDC 21 neiin sorkarna an siam thei reng tih sawiin, "Kum 2023 General Election thlir rànin an thawkho duh lo a, Mara mipui dinhmun ngaihtuah miah loin sorkarna an siam duh lo," a ti a; Congress party pawhin nakkum inthlan thlirin BJP chu thawhpui chia an ngaih loh thu a sawi.

Congress party President chuan, "MNF pawh hi tuna an hnûhmá leh an sorkar ṭhat loh êm avang hian thawhpui chi-ah kan ngai lo. Kan thawhpui chuan MLA election campaign hunah sawi tur kan neih pawh kan ring lo," a ti a; nimin lawk thlenga an beih reng thawhpui leh si chu ṭha lo an ti tih sawiin, "Chuvang chuan thawhpui loh ni se tih hi PAC hian vawi thum a rél a, a vawi lina atan kan dinna hi kan puang nawn leh a ni," a ti bawk.

Hetih lai hian, thu a sawi zawha Vanglaini palaiin Congress MDC palite chunga action an lak dawn leh dawn loh a zawhna chu Lalsawta chuan, PAC thutlukna a puan chin bâk chu sawi belh tur a neih loh thu a sawi.

MADC-ah hian Congress MDC pali leh MNF MDC pakuate'n sorkarna an siam mek a, Congress MDC-in chief executive member an chang a, MNF-in deputy CEM an chang a ni.