India rama college ṭha 45-na Pachhunga University College
Sorkar laipui Ministry of Education hnuaia zirna sang dinhmun endiktu, National Institutional Ranking Framework (NIRF)-in ranking an siam tharah Pachhunga University College chu India rama college ṭha 45-na a ni a, Mizoram University chu university ṭha 78-na a ni.
NIRF Ranking 2022 hi nimin khan New Delhi-ah Union Education minister Dharmendra Pradhan-a'n a tlangzarh. Ranking tharah hian PUC chu India rama college ṭha 45-na a ni a, India hmarchhak state-a college zingah India rama college ṭha zual 100 zinga lang pha awm chhun a ni.
University ṭha zual 100 zingah MZU chu 78-na a ni a, hmarchhak state bikah palina a ni. Hmarchhak aṭanga MZU aia sangte chu - 36-na Gauhati University, 59-na Tezpur University, Assam leh 66-na North Eastern Hill University, Shillong-te an ni.
NIRF hian zirna-in ṭha thlanna atan hian tehfung (parameter) hrang hrang a nei a; chu'ng zingah chuan - zirlai dinhmun zir chianna, university exam result neih ṭhat dan, research an beih nasat dan, research paper tihchhuah dinhmun, mithiamte'n an hmuh dan, zirtirtu leh zirlai inphut tâwk dan (ratio), zirtirtu zinga doctorate nei an tam dante a tel.
A pumpuiah (zirna-in sang zawng zawng khaikhawmna) Indian Institute of Technology, Madras chu pakhatna a ni a; Mizoram aṭangin lang pha an awm lo.
NIRF Ranking 2022-ah hian college bikah Miranda House, Delhi chu pakhatna a ni a, university-ah Indian Institute of Science, Bengaluru chu pakhatna a ni.
Category danga pakhatnate chu - medical-ah All India Institute of Medical Sciences (AIIMS), Delhi; dental-ah Saveetha Institute of Medical and Technical Sciences, Chennai; pharmacy-ah Jamia Hamdard, Delhi; research-ah Indian Institute of Science, Bengaluru; engineering-ah Indian Institute of Technology, Madras; management-ah Indian Institute of Management, Ahmedabad; architechture-ah Indian Institute of Technology, Roorkee leh, law-ah National Law School of India University, Bengaluru te an ni.