ZPM leh Mizo Convention hruaitute inkâwm

ZPM working president leh hruaitu dangte chuan July 14, Ningani leh nimin khan Jampui tlangdung an tlawh a, Sabuala Raja Hrangvunga inah leh Behliangchhipa Hill Crest Medical Center-ah Mizo Convention hruaitute nen an inkâwm.

K Sapdanga chuan, Thaidawr tlang chu India sorkar pawmpui geographical map-ah Mizoram chhung ni si, Tripura sorkara Tourism department-in kut an thlak daih mai chu mak a tih thu leh hriatthiam harsa a nih thu a sawi a, "Pathianin hnamte siamin ramrite min khamsak a, a humhalh erawh chu hnamte kut a ni. Hei hi kan tih ngam loh chuan ram mi petu leh hnama min siamtu thu awih lohna a ni," a ti.

Mizo Convention hruaitute chuan, Thaidawr tlang buaina chu chinfel vat a nih theih nan Mizoram sorkarin hma la se, Tripura sorkar nen inbe thuai se an duh thu te, kuhva chungchangah Hachhek tlangdung nen buaina inang an hmachhawn thute an sawi.

Jampui tlangdunga khaw hrang hrang hruaitute chuan, Thaidawr tlang chu Mizoram sorkarin a enkawl ngai loh avangin Tripura sorkarin a ta chei ta nia a lan thu te, chhantu nei lo nia inhriat cháng an neih thu te, ṭanpuitu an mamawh thu te, ramri chungchanga Mizoram sorkar an dàwrnain awmzia a neih loh thute an sawi bawk.

ZPM Working President hi MLA Dr Vanlalthlana leh ZPM party hruaitute'n an ṭawiawm a ni.