Chhungkaw 32,756 hnenah SEDP Ṭanpuina pek a ni tawh - H Rammawi

MNF party chu nimin khan Mizo Hnam Runah an inkhâwm a, MNF adviser H Rammawi, Planning Board vice chairman ni bawkin thu sawiin, SEDP hnuaiah chhungkaw 32,756 hnenah bul ṭanna pek a nih tawh thu a sawi.

H Rammawi chuan, "SEDP hnuaia pilot project-ah chhungkaw 32,756 hnenah bul ṭanna pek tawh a ni. Kumin chhungin chhungkaw 60,000 chuangah Rs 50,000 zela pek hman tuma hmalak mek a ni," a ti.

MNF Adviser chuan, kum 2020 aṭangin Aizawl khawpuiah ropeway siam tura hmalak a nih thu sawiin, "Company-te nen inremna siam vek tawh niin, ground survey neih mek a ni," a ti a; budget-a sum hmuh tarlang kim duh loa MNF sorkar puhtu party-te chu budget kalphung an hriat loh vangah a puh.

H Rammawi chuan, Mizoram hruaitu hma­sate'n theihtawp chhuah­in ram humhimna an lo thawk ṭhin tih sawiin, "MNF chu ram neitu thinlung pu chunga hma la ṭhin party a ni. Neitu thinlung pu chunga ram hruai hna thawk ṭhinte zarah ram mipuite'n hlâwkna an tél a, ramin hma a sawn ṭhin," a ti.