KHAWTHLIR
Thuthlung ziak
Mizoram University leh Census of India chuan MZU-a Census Research Workstation din turin July 14 khan thawhhona thuthlung an ziak. Thuthlungah hian MZU aiawhin registrar Prof. Lalnundanga leh Census of India aiawhin director Rabindra Reang ten hming an ziak a; Workstation aṭang hian a duh apiangin awlsam takin Census data an hmu thei dawn niin MZU chuan a tarlang.
Bungrua dang zel
Champhai District Lirthei Inzawmkhawm Pawl chuan Myanmar aṭanga dan loa Mizorama bungrua lutte an dang zui zel a; an thil phûtah sorkar aṭanga chhànna an hmuh hma chuan dan zel an tum. Nimin kha ni thum an danna a ni a, nepnâwi leh thil dang zuartute chuan bungrua an inlâk khâwl hman avangin harsatna an la tâwk rih lo nia thudawn a ni.
MPYCC-in râl
Congress party ṭhalaite chuan July 11, 2022-a thi Lalhriatpuii, Dawrpui Vengthar chu nimin khan an inah an rál. Lalhriatpuii hi Excise & arcotics department-in May 27, 2022-a Millennium Centre-a grape wine an mansakte zinga mi a ni.
Kawngpui sirah leivûng paih khap
Aizawl District Disaster Management Authority chairman Dr Lalhriatzuali Ralte, bawrhsap ni bawk chuan nimin khan Aizawl district-a lui leh kawngpui sîra leivûng/bawlhhlawh paih khapna thupek a tichhuak a; dan bawhchhia hmute chu lirthei number leh bawlhhlawh paih lai thlalakte phone number 8787451776-ah whatsapp hmangin thuneitute hriattir turin a chah.
Hnathawh thlir lêt
Environment, Forest & Climate Change minister TJ Lalnuntluanga hoin nimin khan PCCF conference hall-ah EFCC officer-te'n an hnathawh an thlir lêt a; hna kal mek te, forest clearance/environmental clearance/wildlife clearance leh department inrêlbàwl dante an sawiho bawk.
Sangha man khap
Kolasib DC John LT Sanga chuan, Serlui-B Hydro Electric Power (HEP) tuikhuahah sangha leh nungcha dangte man phal a nih loh thu a puang a; thupek bawhchhiate chu IPC Section 188 hmanga hrem theih an nih thu a tarlang. DC thupekte chu - tuikhuah huam chhungah phalna nei loin sangha leh nungcha man loh tur., túr chi hrang hrang, chinai, bleaching powder, adt. hmanga nungcha man khap tlat a ni, dynamite, generator, gelatin leh puak thei chi hrang hrang hmanga sangha man khap a ni tih leh Serlui tuikhuah hi enkawltu bik leh phalna pe theite hnen aṭanga phalna nei thlap an nih loh chuan a chhunga nungchate khawih leh man phal a ni lo tih a ni.