Lalduhoma'n Champhai Winery a tlawh

ZPM leader Lalduhoma chuan nimin khan Champhai Winery a tlawh a, Champhai Grape Growers Society hruaitute nen inkâwmin, harsatna an tâwk chu pawi an tih thu leh hriatthiam har an tih thu a sawi.

Lalduhoma chuan, Mizorama thar grape sâwngbàwlna mumal tak a awm chu lawmawm a tih thu a sawi rualin, "Harsatna in tawk mai hi pawi kan tiin hriatthiam har kan ti a. Food Safety and Standard Authority of India-in grape wine hi food item-ah a puang a, winery pawh hi food processing unit-a ngaih a ni. In winery hi zu siamna factory a ni lo a, food proceesing unit zinga mi a ni," a ti.

Grape tui sâwrte chu Mizoram mai ni lo, state páwn thlenga thawn chhuah dan turte ngaihtuahin hma nasa takin an la tih an hriat thu sawiin Duhoma chuan, "Tuna hetiang dinhmun in thleng ta mai hi pawi kan ti em em a, theihtawpa lo tlangaupui che u hi tunah chuan kan tih theih tâwk a ni rih," a ti a; tuna an thlen chinah lungawina a awm loh thu a sawi.

Lalduhoma chuan, ZPM party-in thuneihna an chang a nih chuan an policy hnuaiah ṭanpuina an pek dawn thu sawiin, "Entrepreneurship kan ngai pawimawh a, bul ṭanpui tlâk an nih a, project hlawhtling tur a nih chuan kan pui dawn. Sorkar hi guarantor-ah a ṭang mai dawn a, ṭhalai thiamna nei si, bul ṭanna nei lote kan chawi kâng dawn a ni," a ti.

ZPM Leader chuan, grape wine zuartu Lalhriatpuii, cheng nuai 20 chuang man grape wine a zawrh mansak a nih hnua tun hnaia a thi chu pawi an tih tak zet thu a sawi bawk.