Serlui MLA-in hmanrua a sem

Serlui bialtu MLA Lalrinsanga Ralte chuan nimin khan a pisa-ah a bial chhunga mamawhtute hnenah wheelchair pali leh bengdár panga a sem. Kolasib District MJA hnenah Kolasib Press Club sak chhunzawmna turin MLA fund aṭangin Rs 2,00,000 a hlân bawk.

Lalrinsanga Ralte chuan, Zoramthanga kaihhruai sorkar chuan ramri hmasawnna atan hma nasa takin a la nia sawiin, "Nikum khan Buarchepa kan sipai duty-te awmnaah electric current pawh luh tawh niin Aitlang lui rala kan sipai duty post pahnih - Dara huantlang leh Tlangpuiah te electric current pawh thlen a ni leh ta hi a lawmawmin, sorkarin ramri a ngaihsak zia lanna a ni," a ti a, Vairengteah IR company headquarter dah thar a nih thu a sawi.

Ramri hmasawnna atan Mizoram sorkar chuan ruahmanna hrang hrang siamin, ramria sipai duty-te awmna tur inte sak ṭhat sakin, in a sak belh mek zel nia sawiin Serlui Bialtu MLA chuan, "Ramri humhalhna leh ramri depa awmte hmasawnna atana kawng a laihte cheiṭha turin sorkar chuan ruahmanna siamin chak takin a bawhzui mek a ni," a ti.