District tharah KVK din belh turin Agri. Minister-in sorkar laipui a ngen

Agriculture minister C Lalrinsanga chu July 14-15, 2022 chhunga Bangalore-a National Conference of State Agriculture and Horticulture Ministers-ah a tel a, Mizorama district thar pathumah Krishi Vigyan Kendra (KVK) din belh turin sorkar laipui a ngen. Inkhawmpuiah hian Union Agriculture minister Narendra Singh Tomar khuallian a ni.

Inkhawmpuiah hian agriculture leh horticulture lama India ramin hmasawnna bung thar kài a tum dante sawiho a ni a, mithiamte'n thu an sawi bakah, state minister-te'n an state dinhmun leh harsatnate an thlen a, Mizoram Agriculture minister C Lalrinsanga pawhin Mizoram dinhmun a sawi.

C Lalrinsanga chuan, Mizorama district thar pathum - Saitual, Khawzawl leh Hnahthial district-ahte KVK din belh turin sorkar laipui a ngen a; Mizoram mamawh sawiin, central scheme pangngaiin a tuam ngai loh agriculture link road leh hill terracing chungchang a sawi. Central scheme hrang hranga kaihhruainate chu hmarchhak state-te tan siam rem a ngaih ṭhin thute a sawi bawk.

Kum 2021-a National Good Governance Index-ah Mizoram chu hilly state category-ah Agriculture and Allied Sector-ah pakhatna a nih thu sawiin, Mizoramin agriculture lamah theihna a ngah thu leh sorkar laipui tan pawha duhsak bik a ṭul thu a sawi. Sorkar laipui hotute pawhin, an lo en zui nghal tur thuin an chháng niin sorkar thuchhuah chuan a tarlang.

C Lalrinsanga hian Bangalore Mizo Association hnenah a ṭula hman atan Rs 30,000 a pe a; Agriculture department hotute'n an ṭawiawm a ni.