Covid-19 vaccine precaution dose kum 18-59 inkar tan a thlàwnin lâk theih

Health minister Dr R Lalthangliana chuan, sorkar laipuiin India ram zalenna kum 75-na pualin kumin July 15 aṭanga September 30 inkarah kum 18-59 inkarte hnenah a thlàwna Covid-19 vaccine precaution dose pek rûnpui, Covid Vaccine Amrit Mahotsava a puang tih a sawi.

He thu hi Health Minister hian nimina district hrang hranga DC, chief medical officer leh Information & Public Relations officer-te internet kaltlangin thil pawimawhte a sawipuinaah a sawi a ni.

Health Minister chuan, sorkar laipuiin Covid vaccine dose thumna - precaution dose a ngai pawimawh tih sawiin, "Healthcare worker, frontline worker leh kum 60 chung lam tan sorkar vaccination centre-ah a thlàwna lak theih tih a puang tawh a, hei hi vawiin aṭangin kum 18-59 inkar a rawn huamtir bakah, a duh tan private hospital-ah man cháwia lâk theih tura ruahman a ni," a ti.

Covid vaccine precaution dose hi second dose la tawhte tan second dose lak aṭanga thla ruk a liam hnuah lak theih a ni.

Ṭhutkhawmah hian, Health & Family Welfare Board vice chairman Dr ZR Thiamsanga, HFW secretary Esther Lalruatkimi leh principal director Dr T Lalhmangaihi te pawh an tel a; district tinah dedicated covid health centre (DCHC) tinung thar tur te, district hospital, CHC, UPHC, PHC leh sub-centre-ahte RAT hmanga swab sample test theih vek tura ruahmanna siamte an rêl a ni.