Hripui vei sang khat an tling leh tawh

July 14, Ningani khan Mizoramah Covid-19 vei mi 119 hmuh chhuah a ni a, hripui vei inenkawl mek mi sang khat an chuang leh tawh. Nimin khan hripui vei dam tawh mi 31 chhuahtir an ni a, Covid-19 vanga thi an awm lo.

Ningania Covid-19 positive hmuh thar mi 119-te chu mipa 67 leh hmeichhia 52 an ni a, Rapid Antigen Test hmanga hmuh chhuah vek niin, positivity rate 20.24% a ni.

Tun July thla ni 14 chhungin Covid-19 positive mi 1,242 hmuh chhuah a ni tawh a, June thla chhunga hmuh zat 770 aiin 472-in a tam tawh zawk.

IDSP record angin, Mizoramah Covid-19 vei 2,30,348 hmuh chhuah a ni tawh a, mipa 1,07,237 leh hmeichhia 1,23,111 an ni a, mipa aiin hmeichhia 15,874-in an tam zawk. Nimin tlai dar 5 thleng khan mi 2,28,606 (99.24%) chhuahtir an ni tawh a, mi 706 (0.31%) thi tawhin, enkawl mek mi 1,036 (0.41%) an awm.