NHM-a thawkte an la nuar zel ; Sorkarin insawifiah turin a hriattir

National Health Mission (NHM) hnuaia thawktu mi sang hnih chuangte chu an la nuar chhunzawm zel a; hetih lai hian, Mizoram sorkar chuan NHM hnuaia thawkte chu show cause notice pein, ni thum chhunga insawifiah turin a hriattir.

Health & Family Welfare department chuan July 15, 2022 khan NHM Mission Director hnenah lehkha thawnin, NHM hnuaia thawk, nuar mekte hnenah show cause notice pe turin a hriattir a, "A rang thei ang bera an hna zawm tur leh an hna aṭanga bàn an nih lohna tur chhan ziaka ni thum chhunga i hnena rawn sawifiah tura hriattir turin ka ngen a che," a ti a; hmalakna report a rang thei an bera sorkara hriattir tura tih a ni bawk.

NHM mission director Dr Eric Zomawia chuan sorkar thupek bawhzuiin NHM hnuaia thawk nuar mekte chu mimal tin lehkha pein, ni thum chhunga insawifiah turin a hriattir a; a rang thei ang bera hna chhunzawm tur leh an nawrh avangin an hna aṭanga bàn an nih loh chhan tur ziaka ni thum chhunga thehlut turin a hriattir a ni.

Show cause notice lehkhaah chuan, phalna nei loa casual leave an lak hnuah tiam chin awm loa an nawrh thu te, Mizoram Essential Services Maintenance Act, 1990 an bawhchhiat thu te, hnaa an luh dawna an intiam­kamna an bawhchhiat thute tarlan a ni a; chu'ngte chu kum khat thleng tàntir theihna leh Rs 2,000 chawitir theihna a nih thu tarlan a ni bawk.

Thu dawn danin, show cause notice copy hi sem mek zel a ni a, hmu tawh an awm laiin, a tam zawk chuan an la hmu lo. Lehkha sem turin NHM hnuaia thawkte tho koh an ni a, mahse, an kal duh loh avangin Health department-a a ngheta thawkte'n an sem a, hmun ṭhenkhatah chuan ambulance hmangin an sem a ni.

NEUM hruaitute chuan, "Lehkha (hard copy) an sem a, a ṭhenah chuan soft copy ring turin an ti bawk a, whatsapp-a inthawn hi thu tlingah ngaih a ni tawh," an ti a; hming hmerha lehkha dawngte chu chhanna thawn tura an inchah thu leh, mahni hming ngei chuanna lehkha ngei dawng lote tan erawh chuan insawifiahna thawn kher a ṭul loa an ngaih thu an sawi.

Thu dawn danin, sorkar department 16-ah centrally spon­sored scheme (CSS) hnuaia thawk mi 10,654 an awm a, chu'ng zinga mi 2,590 chu Health department hnuaia thawk an ni.

CSS hnuaia Health depart­ment-a thawk mi 2,590-te chu - NHM hnuaia thawk mi 2,087, MSACS-a thawk 317, National Ayush Mission hnuaia thawk 120, Food & Drugs Administration hnuaia thawk 28 leh directorate-a thawk mi 38 an ni.

NHM hnuaia thawk mi 2,087-te chu post chi hrang 43-a mite an ni a, service delivery bikah mi 1,580 leh programme management-ah mi 507 an ni. Mi 2,087 zingah specialist doctor 10, medical officer (doctor) 62, dental surgeon 22, AYUSH doctor 73, staff nurse 323, health worker 355, laboratory technician 115, health & wellness officer 195 an tel.