SEDP hnuaiah vaimím chi Mi 17,500 vel hnenah sem a ni
Mizoram sorkar flagship programme, Socio Economics Development Programme (SEDP) hnuaiah vaimím chî chhungkaw 17,500 vel hnenah sem a ni a, sem chhunzawm a ni tawh lo.
Agriculture department aṭanga Vanglaini thu dawn danin, vaimim chi hi chhungkaw pakhatah ip khat zel pek niin, chhungkaw 17,500 vel hnenah sem a ni a, ip khatah kg. 20 a awm. A dawng tura thlante hnenah sem zawh a ni tawh a, sem chhunzawm a ni tawh lo a ni.
Vanglaini thu dawn danin, hmun ṭhenkhatah chuan vaimím chìnna hmun tur ram an neih leh neih loh zâwt chiang hmasa loin SEDP hnuaiah hian vaimim chi dawng tura thlan an ni a; dawng tura thlan zingah vaimim chìnna tur ram nei lote eng emaw zat an tel. Vaimim chi dawng tura thlan zingah dawng duh lote pawh an awm bawk.
Vaimim chi dawng tura thlan pakhat chuan, local council aṭangin SEDP dawng tura thlan a nih thu phone kaltlanga hrilh an nih thu Vanglaini a hrilh a, "Kan sum dinhmunin a zir loh êm avangin kan lawm hman viau a, mahse, kan han hre chiang chu, vaimim chi chauh dawng tur kan lo ni a, a chìnna hmun tur ram kan nei lo hrim hrim," a ti.
Aizawl veng pakhata vaimím chi dawngtu pakhat chu mi in luaha khawsa a ni a, vaimim chìnna tur ram a nei lo. Vaimim chi a dawn chu mamawh leh duh tur zâwt kualin, duh an awm chuan a pe ṭhin a ni.
Vaimim chi hi SEDP hnuaia sem a nih angin, a dawng tur pawh SEDP Board/ Committee-in an thlang a; Agriculture department-in SEDP buaipuitute'n dawng tura an thlante hnenah an pe ṭhin.
Vaimim chi an sem ip (bag) páwn lama a lan danin, vaimim chi chu National Agricultural Cooperative Marketing Federation of India Ltd. siam a ni a, ip khat Rs 5,851 man niin, kg. khat man chu Rs 292.55 tihna a ni. Hetih lai hian, vaimim chi hi Mizorama thartute hnen aṭangin sorkarin kg. khat Rs 25-in a leisak nia sawi a ni.
Vanglaini palai zawhna chhángin Agriculture department hotute chuan, vaimim chi chu a ipa inziak anga an lei loh thu an sawi a, "Kg khat Rs 143.50 hisápin kan lei. A chi tura uluk taka sâwngbàwl a ni a, tualchhunga hralhna ai chuan a to deuh mai thei," an ti. Vaimim chi an sem hi ip khat Rs 2,870 man a ni.