MPYCC-in ṬBCC dinhmun an enfiah

July 16, Inrinni khan Ṭawngṭai Bethel Camping Centre (ṬBCC) chu Power & Electricity department-in kawlphetha pek an tihtawpsak nia sawi a ni a; an dinhmun enfiah turin Inrinni vêk khan Congress party ṭhalai hruaitute'n ṬBCC an tlawh.

MPYCC tarlan danin, ṬBCC hotu Zohmingthanga chuan, electric power chu phase-III an pawt a, Chawnpuia an awm laia an chawi ang, thla khatah Rs 2,000 - 3,000 vel cháwi turah an inngai tih a sawi a; electric bill a sàn tâk avangin an pe thei lo fo tih a sawi.

Zohmingthanga chuan, thla hmasa lam aṭangin electric bill cheng nuai 5 dáwn an pek theih loh avangin tihtawpsak an nih tur thu hriattir an ni a, a zatve tal pe tura tih an ni bawk. Chumi hnuah Rs 25,000 an pe a; July 16, 2022 khan electric connection tihtawpsak an ni ta a ni.

Congress ṭhalai president Dr Lalmalsawma Nghaka chuan ṬBCC ṭanpui nan Rs 10,000 a pe nghal a ni.