Kolasib MJA-te'n kawng an enfiah

MJA, Kolasib district member-te chuan July 16, Inrinni khan Governor Dr Hari Babu Kambhampati thu bawhzuiin Khàmráng leh Vairengte inkar NH-306A kawngpui dinhmun an enfiah.

Kolasib District MJA hian June 8, 2022 khan Governor-in Kolasib a tlawh ṭumin National Highway & Infrastructure Development Corporation Ltd. (NHIDCL) hnuaia kawng siamtu contractor-te'n kawngpui an siam dan leh an hnathawhte a tlo loh avangin a ṭul anga bawhzui turin ziakin an lo thlen a; Governor chuan Kolasib MJA hruaitute chu kawngpui chhiate a hmunah enfiah tur leh thil awm dan a hnenah thlen turin a chah a ni.

Khamrang leh Vairengte inkar kawngpui NH-306A hi tunlai hian hmun ṭhenkhat a chhia a, lirthei tana kal harsa a awm nual tawh a, kumin kum tira an thawm ṭhatte pawh kumin May thla aṭang khan a chhe leh nual tawh a ni. Tunlai hian Vairengte leh a chhehvela kawng chhe zual lai chu NHIDCL hnuaia contractor Ratna Constructions Pvt. Ltd chuan rawra leh leivûng hmangin an chhilh ṭha mek.

Kolasib MJA-te hian kawngpui an tlawhnaa an thil hmuhte chu Governor hnenah hian ziakin an thlen dawn a ni.