Kan sorkar veleh eirûkna kan bitum dawn - Lalduhoma
ZPM leader Lalduhoma chuan, ZPM party chuan a din tirh aṭangin thîktu leh ertu a ngah thu leh, Mizorama sorkar ding tawhte ang ni lo, party sorkar ni lo, mipui sorkar din an tum a, an sorkar veleh eirukna bitum an tum thu a sawi.
Lalduhoma hian kar liam ta tàwp lam khan Champhai Kanan Veng, Bethel Veng kâwn, Kelkang leh Dilkawnahte vantlang inkhawm neiin thu a sawi a; ZPM chuan a din tirh aṭangin thîktu leh ertu a ngah tih sawiin, "Sorkar siam turin theihtawpin kan ṭang ve a, kan sorkar siam tum hi chu a danglam a, sorkar kan hrawn tawh ang ni lo, party sorkar ni lo, mipui sorkar a ni," a ti.
ZPM Leader chuan, "Kan sorkar veleha kan bitum hmasak tur chu eirukna a ni. Eirûkna hi a lu ber aṭanga inṭan a ni a, chief minister ber a fihlim loh chuan a hnuaia mite an fihlim thei lo," a ti a; kalphung mumal tak hmangin eirûkna hneh theih a nih thu a sawi.
Lokayukta chu eirûkna veng tura din a ni tih sawiin Duhoma chuan, "Tuna kan Lokayukta neih hi chu a hming mai a ni a, thawktu pawh an awm mumal lo. Kan sorkar hunah chuan tun aia changtlung zawkin kan thuam ang a, hnathawk theiin kan siam dawn. CBI kan ko lut dawn a, zalên taka hna an thawh theihna turin zalenna leh thuneihna kan pe dawn a ni," a ti.
Lalduhoma chuan, an sorkar huna ram an kaihhruai dan tur mithiamte nen an duang tawh a, sorkarna siama rorel turin an inpeih tawh tih sawiin, "Kut hnathawktute hi kan ngaih pawimawh ber an ni reng a, ei leh bâra kan intodelhna tura thawktu ber chu kut hnathawktute an ni," a ti a; thlai hralhna tur leh a hralhna man tur hre sain thlai chìn a nih dawn thu leh bána kaih policy hmangin kut hnathawktute an chàwi kàn dawn thu a sawi.
Ṭhalaite an ṭhangharh nasa a, thiamna nei ṭha tak tak leh kutkawih sumdawnna lamah hma an sawn nasa tih sawiin, "Kan ṭhalaite mahni intodelh tura hmalakpui kan châk tawh em em a ni," a ti bawk.
ZPM thuchhuah chuan, Champhai leh a chhehvelah hian ZPM zawm thar mi 553 chu Lalduhoma'n a lâwm lut niin a tarlang.