Mizoram sorkarin PMJVK sum Rs 1,20,13,27,401 a hrèn mek ; Pe chhuak turin Mizoram sorkar phût

PMJVK aṭanga Mizoram sorkarin sum a hmuh zinga Rs 1,20,13,27,401 chu Finance department-in a la hrêng mek a, chungte chu kum 2018-18, 2019-20 leh 2020-21 financial year-a dawn tawhte a ni. Sum hrên mekte chu a rang thei ang bera Mizoram State Sports Council (MSSC) hnena pe turin NSUI, Mizoram chuan Mizoram sorkar an phût.

RTI Act hmanga zawhna MSSC SPIO-in a chhan danin, Sports & Youth Services department-in PMJVK aṭanga sum sanction a hmuh zat chu kum 2019-20 ah Rs 2,28,73,18,000 leh kum 2020-21 ah Rs 1,88,58,49,000 a ni a; a vaiin Rs 4,17,31,67,000 a ni.

Kum 2019-20 leh 2020-21 chhunga sum sanction hmuh Rs 4,17,31,67,000 aṭangin Mizoram sorkarin sumfaia a dawn tawh zat chu Rs. 1,87,25,29,000 a ni a; Rs 2,30,06,38,000 dawn a la ni lo. Sum dawn tawh Rs 2,30,06,38,000 zinga Rs 67,17,01,599 chu MSSC hnenah pek a ni tawh a, la pek loh Rs 1,62,89,36,401 a awm.

Kum 2018-19 aṭanga 2020-21 chhunga SYS department -in PMJVK project aṭanga sum a hmuh tawh aṭangin Rs 1,20,13,27,401 chu Finance department-in a la hrènsak mek a; chu'ngte chu - kum 2018-19-a mi Rs 1,27,44,000, kum 2019-20-a mi Rs 34,75,11,401 leh kum 2020-21-a mi 84,10,72,000 a ni.

Hetih lai hian, sum first instalment dawn tawh, hman loh avangin Ministry of Minority Affairs-in sum a la kawl tàn zat Rs 3,01,90,39,599 a awm bawk a; chu'ngte chu kum 2018-19-a mi Rs 3,44,56,000, kum 2019-20-a mi Rs 1,93,98,06,599 leh kum 2020-21-a mi Rs 1,04,47,77,000 a ni.

National Students Union of India, Mizoram chuan, ṭhalaite hmasawnna turin sorkar laipui aṭanga sum lo kal a tam hle tih sawiin, "Sum lo kal Mizoram sorkarin a tihtàn a tam em em a, ṭhalaite hmasawnna tur dâltuah kan ngai. A rang lamin sum hi pe chhuak turin Finance department leh a changtu Chief Minister kan ngen a ni," an ti.

NSUI chuan, Congress sorkar laia Lammuala phûl lem phah chu a chhe tawh hle tih sawiin, "A rang lama chei thara siamṭha turin Mizoram sorkar kan ngen," an ti. Lammual chei ṭhat chungchangah hian MSSC chuan RTI Act hmanga zawhna chhángin, "Lammual hi I-League khelhna atan pawm a ni lo a, I-League khelhna tlaka siamṭhat law law ṭha kan ti a, funding zawn mek a ni," a ti bawk.