Thla 3 hnua hripui vei hmuh tam ber ní

July 15, Zirtawpni khan Mizoramah Covid-19 vei mi 66 hmuh chhuah a ni a, July 16, Inrinni khan mi 175 hmuh chhuah bawk niin, kumin thla thum chuang hnua hmuh chhuah tam ber ní a ni. Inrinni leh nimin khan hripui vei dam tawh mi 85 chhuahtir an ni a, Covid-19 vanga thi an awm lo.

July 15-a Covid-19 positive hmuh chhuah mi 66-te chu mipa 30 leh hmeichhia 36 an ni a, Rapid Antigen Test hmanga hmuh vek niin, positivity rate 16.18% a ni. Inrinnia hripui vei hmuh thar mi 175-te chu mipa 80 leh hmeichhia 95 an ni a, RAT hmanga hmuh chhuah vek niin, positivity rate 28.04% a ni.

Covid-19 vei July 16-a hmuh chhuah zat 175 chu thla thum chuang hnu, March 28, 2022 hnua hmuh tam ber ní a ni a, March 28 khan mi 248 hmuh chhuah a ni.

July 16, Inrinni khan hripui vei dam tawh mi 44 chhuahtir an ni a, nimin khan mi 41 chhuahtir an ni bawk.

IDSP record angin, Mizoramah Covid-19 vei 2,30,589 hmuh chhuah a ni tawh a, mipa 1,07,347 leh hmeichhia 1,23,242 an ni a, mipa aiin hmeichhia 15,895-in an tam zawk. Nimin tlai dar 5 thleng khan mi 2,28,691 (99.18%) chhuahtir an ni tawh a, mi 706 (0.31%) thi tawhin, enkawl mek mi 1,192 (0.51%) an awm.

Kum 2011 chhiarpui angin, Covid-19 vei hmuh tawh 2,30,589 chu mi 1,000 zelah positive 210 an awm tawh ang a ni a, hripui vangin mi 1,00,000 zelah mi 64 an thi tawh ang a ni bawk.