KHAWTHLIR

India President thlang dawn ta
Vawiin hian India ram pumah President tur thlan a ni dawn a, Mizoramah pawh Assembly building-ah vote thlak a ni dawn. Vote thlâk hun hi chawhma dar 10-ah hawn a ni dawn a, tlai dar 5 thleng vote thlak theih a ni ang. President inthlanah hian Mizoram Assembly secretary H Lalrinawma chu presiding officer a ni a, vote tlate chu July 21, 2022-ah Parliament House-ah chhiar a ni ang. President thlang thei mi 4,809 an awm a, MP pakhat vote hlutna chu 700 niin, MLA pakhat vote hlutna chu 8 a ni a, voter 4,809-te vote hlutna chu 10,86,431 a ni. Mizorama MLA 40-te bik vote hlutna chu 320 a ni.

Khaw chhak kuhva rah a thleng reng
Kolasib District MJA member-te chuan July 16, Inrinni khan North Chhimluang leh Vairengte khaw dáia kuhva leh leiṭha (fertilizer) dahkhawmna kudamte an tlawh a, thu an dawn danin, kudamah hian khawchhak lam aṭangin kuhva ro truck-in a phur thleng deuh reng a, a khát tâwkin phai lamah phurh thlâk ṭhin a ni. Kudamah hian fertilizer tam tham tak a awm bawk.

Minister-in tlawh
Agriculture minister C Lalrinsanga chuan July 16, Inrinni khan Lengpuia Bio Control Laborarory sak mek a tlawh. Minister chuan, "Mizoramin Bio Control Laboratory kan nei tur hi thil lawmawm tak leh kan state tana mellung pawimawh tak a ni," a ti. Laboratory hi Mizoram sorkar leh NABARD sum cheng vbc 2.73 hmanga din tur a ni.

Thisen pe
July 16, Inrinni khan YMA, Dinthar Branch, Aizawl chuan an golden jubilee lawmna pualin Civil Hospital, Aizawl tan thisen unit 119 an pe a, petute mipa 101 leh hmeichhia 18 an ni. KṬP, Kolasib Venglai Bialin District Hospital-ah thisen unit 42 an pe a, petute mipa 30 leh hmeichhia 12 an ni a; ṬKP, Bethlehem Unit, Lawngtlai pawhin thisen pek huaihawtin, mipa 18 leh hmeichhia pahnihte'n District Hospital tan thisen unit 20 an pe bawk.