Licence nei mumal loa internet pe ṭhinte lakah dan anga hmalak a ṭul - MP Rosanga

Telephone Advisory Committee chuan an chairman C Lalrosanga, Lok Sabha MP hoin July 15, Zirtawpni khan Secretariat conference hall-ah Mizorama BSNL-te hnathawh leh hmalakna an sawiho. MP chuan, Mizorama licence nei mumal loa internet connection pe ṭhin an awm nia sawi chungchangah, dan anga hmalak a ṭul thu a sawi.

C Lalrosanga chuan, Mizorama inbiakpawhna leh thu thawn darhna thuam ṭhat a nih zel theih nan Communication Minister a dawr tawh thu a sawi a, "Mizorama internet a chak zawk theihna tura bandwidth tam zawk a awm theih nan optical fibre cable la thlen lohna district zawng zawng thlentir turin thuneitute ka dawr zel ang," a ti.

Lok Sabha MP chuan, "Mizorama licence nei mumal loa internet connection pe chhuak ṭhin an awm nia sawi chungchangah dan ang taka hmalak a ṭul," a ti a; BSNL harsatna leh mamawhte chu sorkar laipuiah hriattir zel a tum thu a sawi.

Mizoram hmun hrang hrangah signal ṭhat tâwk loh vanga mobile phone hman harsatna la awmte a theih ang anga tihchangtlun a ṭul thu sawiin C Lalrosanga chuan, "Ramri dep, signal awm ṭhat loh avanga mobile phone hman hleih theih lohna hmunahte signal ṭha zawk a awm theih nan ṭan lak thar a ṭul," a ti.