Siaha district-a khaw pahnihah Myanmar aṭanga ráltlânte an lut

Siaha district-a Myanmar ramri depa khaw pahnih - Khaikhy leh Lungpuk khuaahte tun hnai khan Myanmar ram aṭangin raltlan mi 280 vel an lut a, a tam zawk chu hmeichhia leh naupang an ni. Raltlante hi Assam Rifles-te'n a ṭul angin an buaipui nghal.

Thu dawn danin, Khaikhy leh Lungpuk khuaa Myanmar raltlante an luh thu hi Assam Rifles-te chuan May 19 khan an hria a, an hriat veleh Khaikhy khua an pan nghal a ni.

Lungpuk khuaah hian Myanmar aṭanga raltlan mi 200 chuang an awm a, an zinga a tam ber chu hmeichhia leh naupang an ni.

Khaikhy khuaah pawh AR sipaite chu May 20 khan an thleng a, an hriat theih chinah Khaikhy-ah hian raltlan mi 77 an awm.

Raltlante chuan Myanmar ram Chin state-a Ralie khuaa mite an nih thu an sawi a; an in leh khua chhuahsana an tlanchhiat chhan chu, hel pawlte'n an vau a, an in aṭanga an chhuahtir vang niin an sawi bawk.

Myanmar aṭanga raltlante hi Lungpuk leh Khaikhy khaw mipuite chuan an theih ang angin an lo tuamhlawm a, ei tur leh riahna turte an lo buaipuisak niin an sawi.

Khaw pahnihah Myanmar raltlan eng emaw zat an lut tih an hriat veleh Assam Rifles-te hi team hnihah insiamin, thil awm dan hre chiang turin Lungpuk leh Khaikhy an pan nghal a; khaw pahnihte hi May 20 zing khan an thleng. AR-te hian raltlante hriselna dinhmun an enfiahsak nghal nia thu dawn a ni.

Buaina a chhuah loh nan ven­himna lam pawh buaipui nghal a ni a; Siaha deputy SP pawhin Lung­puk khua a thleng tawh. Lung­puk V/C President pawhin an dinhmun chu Siaha DC-ah a hriattir tawh a, raltlante mamawh ang ngaihtuahsak turin a ngen a ni.

Assam Rifles hotute chuan Myanmar sipai hotute an dawr nghal bawk a; Myanmar thuneitute chu an ram mi raltlante Myanmar rama an himna tur ngaihtuahsak turin an ngen a ni.