Mizorama human rights dinhmun a ṭha - NHRC Secretary General

National Human Rights Commission (NHRC) secretary gene­ral Satya Narayan Mo­hanty chuan Mizoram a rawn tlawh a, May 19-20 chhung khan Aizawlah a chám. Mohanty chuan, Mizoram chu India ram state tê zingah human rights dinhmun nei ṭha zinga mi a nih thu a sawi.

Satya Narayan Mohanty hi Mizorama human rights dinhmun hre chiang tur leh hmalakna hrang hrang ngaihven tura lo zin a ni a; May 19 tlai khan Chief Secretary conference room-ah chief secretary Lalmalsawma leh Mizoram sorkara department hotute a kâwm.

Satya Narayan Mo­hanty chuan, NHRC Spe­cial Rapporteur zir­chiannaah Mizoram chu India ram state tê zingah human rights dinhmun nei ṭha zinga mi a nih thu a sawi a; sorkar hotute chu human rights bawhchhiatna awm theite veng tur leh Mizoramah human rights bawhchhiatna a awm lohna atana ṭan la turin a chah.

Meeting-ah hian Social Welfare, Home, UDPA, Rural Develop­ment, Agricul­ture, Health leh FCSCA department hotute an tel a; National Food Security Act 2013 hnuaia Mizoram sorkar hmalakna, jail tángte dinhmun leh an harsatna tawh hrang hrang te, District Mental Health Care Programme hnuaia hmalakna leh MGNREGA hnuaia hna kal mekte sawiho a ni.

NHRC Secretary Ge­ne­ral hian Inrinni khan Universal Women Helpline & One Stop Centre, Khatla a tlawh a, Aizawla home ṭhenkhatte a tlawh bawk.

NHRC hi autonomous public body a ni a, October 12, 1993-ah Protection of Human Rights Act, 1993 dan kengkawh tura din a ni.