KHAWTHLIR

Thisen pe
Inrinni khan Dinthar Branch KṬP-in Aizawl Civil Hospital tan thisen unit 44 an pe a, Zomi Baptist Youth Fellowship-in unit 22 leh Salvation Army Youth Enna Corps-ten unit 15 an pe bawk. Bungtlang Bial KṬP-in Serchhip District Hospital tan unit 35 an pe a, Mualpui Bethel Branch KṬP-in an kum 15 tlin lawm nan Synod Hospital tan unit 25 an pe. Pang Zirlai Pawl, Lawngtlai-in Lawngtlai District Hospital tan unit 18 an pe bawk.

Savawmin seh hlum
Hrangchhuana (73), Kawnpui, Kolasib district chu Inrinni zing dar 9:30 vel khan an leipuiah savawmin a seh hlum. Thu dawn danin, Hrangchhuana hi an khua aṭanga km. 2 vela hlaa an leipuiah chawhmeh la turin amahin a feh a, loa a awm laiin savawmin a bei a, a hmai, a lu leh a taksa hmun dangahte a seh a ni.

MLA-in lawmpui
Lunglei West bialtu MLA Chalrosanga Ralte chuan a bial chhung, Lunglei Bazar Venga HSLC 2017-a Mizoram puma 6-na Vanlalliani Pachuau d/o L Lalhmingmawia chu Inrinni khan chawimawina thuziak leh lawmpuina Rs. 5,000 a hlan.

Pavalai Meet
Mizoram Synod hnuaia Kohhran Pavalai Pawl Meet vawi thumna, May 19, Zirtawpni zana Ramhlun North Kohhran biak-ina ṭan chu nizan khan a ṭiak. Meet-ah hian Mizoram hmun hrang hrang aṭangin Pavalai Pawl member-te an kalkhawm a; thupui, ‘Chhungkuaa Lalpa rawngbawl’ tih chu speaker Rev. Lalsangbera'n a sawi ṭhin a ni.

BCM Kristian Chhungkaw Ni
Nimin Pathianni kha Mizoram Baptist Kohhran ni pawimawh, ‘Kristian Chhungkaw Ni’ a ni a, tualchhung kohhran hrang hrangin an hmang. He ni pual hian chawhma inkhawm leh zan inkhawmah hun an hmang a, thupui chu 'Kei leh ka chhungte erawh hi zawngin Lalpa rawng a nia kan bàwl dawn ni' tih leh, ‘Kristian chhungkaw din tura mawhphurhna’ tihte a ni.

In saksak
Salvation Army, Kawnpui CO bialte'n Kawnpui Hmarvenga chenna in nei lo pakhat tana in an saksak chu Inrinni khan divisional commander Lt.Col. Samu Meitei-in a hawng. In sak nan hian SA Kawnpui Bial Executive Committee member-te'n thingzai man tur Rs. 700 ṭheuh an thawh a, mi dangte'n pawisa leh hmanrua an thawhkhawm bawk. In hi Assam type a dung ft. 15 leh a vâng ft. 12-a zau a sak a ni.

MSS din champha
Mizoram Science Society (MSS) chuan May 19, 2017 khan Pachhunga University College seminar hall-ah an din champha an lawm. He hunah Molecular Biology ṭangkaina leh a tih dante an zirho bakah, PUC laboratory-a hmanraw hrang hrang hman dan leh ṭangkainate Synod Higher Secondary School zirlaite an hrilhfiah. MSS hi May 19, 1979-a din a ni.