2016-ah rûl chuk vanga thi chhinchhiah mi 2

Environment, Forest and Climate Change (EFCC) department chhinchhiah danin, kum 2016 chhung khan Mizoramah rûlin mi 18 a chuk a, chu'ng zinga pahnih chu an thi. Ramsa dangin a beih vanga hliam an awm nual bawk.

EFCC department hotute sawi danin, nikuma rûl chuk vanga thi mi pahnih chhungte hnenah dan angin zangnadawmna Rs. 2,00,000 ve ve pek a ni a, hliam mi 16-te pawh an inenkawlna senso pek an ni. Hliamte chu an nat dan azirin ṭanpuina pek zat a inang lo a, mi 16 tan hian Rs. 87,237 pek chhuah a ni.

Kum 2016 chhung vêk khan ramsain a beih vanga hliam mi pathum an awm a, chu'ng mite chu sorkarin ṭanpuina Rs. 64,334 a pe bawk.

EFCC department hotute chuan, Wildlife (Protection) Act, 1972-in ramsaa a chhiar zinga miin mihring a beih vanga hliam leh harsatna tâwkte chu chhawmdawlna pek theih a ni tih an sawi. Ramsa seh vanga thi hnenah Rs. 2,00,000 pek theih a ni a, ramtuileiloa awmte chu Rs. 2,00,000 thleng pek theih a ni. Hliamte chu an nat dan azir leh inenkawlna senso azirin ṭanpuina pek theih an ni thung.

Vanduaina tawhna hmun chu ramsa humhalhna hmun wildlife sanctuary, national park leh tiger reserve huam chhung a nih erawh chuan zangnadawmna leh ṭanpuinate hi pek theih a ni lo. Ramsain buh hmun a tihchhiat chuan ram hectare khat zelah zangnadawmna Rs. 5,000 pek theih a ni bawk.

Ramsa vanga harsatna tâwkte chuan an bialtu divisional forest officer emaw, ranger officer emaw hnenah hriattir tur a ni a, anni'n chief wildlife warden an hriattir chhawng leh ṭhin a ni.