MHMSA-in pen down strike nei dawn

Mizoram Health Multipurpose Service Association (MHMSA) chuan, an recruitment rules (RR) hman mek siam ṭha tura sorkar an ngenna tihhlawhtlin a nih loh vanga lungawi loh lantir nan kar hmasa khan ni li chhung an hnathawhnaah badge dum an bel a; vawiin aṭang hian pen down strike an nei dawn nia thu dawn a ni.

Thu dawn danin, MHMSA hian lungawi lohna lantir nan hian May 15-19, 2017 chhung khan an hnathawhnaah badge dum an bel a; vawiin aṭang hian May 26 thlengin pen down strike an nei dawn a, an hnathawhna hmunah kal siin hna an thawk dawn lo. May 29-31 chhungin mass casual leave lak an tum bawk.

Lungawi lohna an lantir chung-changah hian MHMSA chuan, RR an hman mek chu an hnathawhnaah lungrual lohna siamtu a nih avangin, kum 1982-2011 chhunga an lo hman tawh aṭanga siamṭha leh tura sorkar ngen turin an general assembly-ah an lo pawm tawh tih an tarlang a; December 9, 2016-a an assembly-in an rel anga March 2017 thleng sorkar an nghah hnuah pawh an ngennain awmzia a neih loh avangin lungawi lohna an lantir ta tih an sawi.

MHMSA chuan, "Hetiang hian ruahmanna hreh tak chung leh siam lo thei loa kan ding hi pawi kan ti em em a. Kan nawrh vanga mipuite'n tuar an awm a nih chuan, an hriatthiamna kan ngen tak meuh a ni," an ti.

MHMSA hian health worker aṭanga supervisor-a kaisanna turah seniority-a 75% dah leh limited departmental exam (LDE)-a 25% dah ṭhin chu tihdanglam a, seniority-ah a vaia dah (100%) an duh a; supervisor aṭanga community health officer (CHO)-a kaisanna turah seniority-a 50%, LDE-a 25% leh BSE-a 25% dah chu tihtawp a, a vaia seniority-a dah an duh a ni.

MHMSA-ah hian Health depart-ment-a thawk, health worker, health supervisor leh community health officer-te an awm a, member 700 chuang an awm mek.