Thing phun beihpui thlak ṭan

Phullen khawtlang chuan, an YMA leh Phullen Welfare Com-mittee, Aizawl bultumin Inrinni khan 'Thing phun hnatlang beihpui hawnna' inkhawm an hmang a, Phullen BDO B Malsawmtluangi'n a hawng.

B Malsawmtluangi chuan, thing phun hnatlang beihpui thlak a ni chu lawmawm a tih thu sawiin, "Thing phun hi sorkarin a ngai pawimawh em em a, kum tin May 5-ah Green Mizoram Day siamin, thing eng emaw zat phun a ni tawh ṭhin. Thing phun hi duhtawk mai loin, enkawl zui tum ila, an mamawh tuite pe ila, enkawl zui zel a ngai a ni," a ti.

Thing phun hnatlang beihpui hawnnaah hian Phullen Welfare Committee adviser Lalbiakdanga leh YMA leh V/C hruaitute'n thu an sawi bawk. Hawnna inkhawm hi Phullen New Khandaihah neih a ni a, inkhawm zawhah thing ṭiak ṭhahnem tak an phun nghal a ni.