Kum kal mekah defence counsel-te hlawhah cheng nuai 9.24 sêng tawh

Court-a thubuai nei, ukil rawihna nei lote hnena sorkarin ukil a pek ṭhin zingah, Additional & District Session Court leh a aia sang Court-a ding thei, defence counsel tia sawi chu Aizawl Judicial district hnuaiah mi 59 an awm mek. Defence counsel-te'n Court-a thubuai an dinsakna atan kum kal mek 2017-18 chhungin sorkarin cheng nuai 9.24 a seng tawh.

Defence counsel-te lawmman/hlawh hi December 1, 2016 khan ukil-te service dan azirin tihsan a ni. A hma chuan Court-a vawi khat an dinin lawmman Rs. 750 an la a; nikum lama an ngen angin, an service rei dan azirin an lawmman chu December 1, 2016 khan sorkarin a tidanglam.

Sorkarin defence counsel-te lawmman a siam thar, tuna an hman mek dan chu, ukil hna kum 20 leh a rei thawk tawhte chuan Court-a vawi khat an dinin Rs. 1,350 an hlawh a, kum 15-20 inkar thawk tawhte'n Rs. 900 leh kum 7-15 inkar thawk tawhte'n Rs. 600 an la a ni.

Defence counsel-te hlawh atan hian Mizoram sorkar chuan kum 2015-16 chhung khan cheng nuai 14.53 a sêng a, kum 2016-17 khan nuai 17.43 a seng. Kum kal mek 2017-18 atan budget-ah cheng nuai 10.50 sorkarin a dah a, thla hnih pawh tling lo, May 5, 2017 thleng khan nuai 9.24 hman a ni tawh. Kum kal mekah thla 10 chuang a la awm a; budget hi hmang zo mah se, a tlachawpin sorkarah an dil belh zel ṭhin.

Defence counsel ni tur hian a tlem berah ukil hna kum sarih aia tlem lo an thawh tawh a ngai. He hna thawk tura sorkara an dilna chu District & Session Court-a judge-in a pawmpui a ngai a; March 17, 2016 khan District & Session Judge, Aizawl Judicial district Lucy Lalrinthari'n Aizawl district atana defence counsel pawmpuina a tichhuak.

Aizawl Judicial district hian Aizawl, Champhai, Kolasib, Serchhip leh Mamit district-te a huam a, Lunglei Judcial district-in Lunglei district bakah Saiha leh Lawngtlai district a huam thung. Defence counsel ni tura dilna hi hnâwl a ni ngai meuh lo a, an dil chuan lak an ni tlangpui. Hetih lai hian, High Court chuan ukil hna kum nga thawk tawh chin chu defence counsel atan a pawm niin District Court-a thuneitute chuan an sawi.

Defence counsel-te hian legal aid hnuaia ukilte'n an khawih theih loh chin Court-ah an dinpui ṭhin a, dam chhunga táng tura hrem theih chin te, thi tura hremna chungchang, NDPS Act, Prevention of Corruption Act, POCSO Act leh National Investigation Agency chungchangte an khawih thei a ni.

Defense counsel-te chuan, an tel loin Court a kal thei lo nia sawiin, "Sorkarin thubuai a chingfel rang a, India ramah hian thubuai chinfel loh a tam hle a, thubuai chinfel zung zung hi Court duh dan a ni. Thubuai chinfel a tam chuan judge-te tan pawh a hmingṭhat thlak avangin, judge-te'n thubuai an chinfel dan High Court-in a vil reng a ni," an ti.