McGregor hmachhawn tur Mayweather

American boxer ropui Floyd Mayweather chuan Conor McGregor nena an inhmachhawn theihna chance chu 90% a nih thu a sawi a, Irish fighter nena inhnek chu 'a tana awmze nei awmchhun' a nih thu a sawi.

Weight division hrang pangaa world champion lo ni tawh Mayweather hian September 2015 khan vawi 49 inhnek a hmachhawna tlawm hmel hmu lo chungin boxing a chawlhsan a, tun hnaia fighter 'hot' tak UFC light­weight champion McGregor nen boruak an neih reng avangin ring chhung a rap leh a nih pawhin a mak lo ang.

Kum 40-a upa boxer chuan, "McGregor nen hian kan inhmachhawn ngei ka ring a, mipuite hi an hmuhchak inhnek kan hmuh tir tur a ni," a ti a, he thu hi a boxer Gervonta Davis-a'n IBF super-featherweight title humhim tura Liam Walsh a hneh hnua a sawi a ni.

Mayweather chuan, "Hmanhmawh taka tih erawh ka tum lo a, McGregor nena inhma­chhawn hi tun dinhmunah chuan ka tana thil awmze nei awmchhun a ni. Paltlang tur pakhat ka la nei a, McGregor hmachhawn tura ka dinchhuah hunah chuan khawvel hian a hre dawn. Floyd Mayweather-a'n inhnek a hmachhawn chuan hriatreng tura chhinchhiah a ni ṭhin," tiin a insawi ropui hle.

Kum 28-a upa Mc­Gregor hian Mayweather nena an inhnekna turin a tih tur chu a tih fel tawh thu leh contract a sign tawh thu a sawi a ni.