Dan theih loh Warriors leh Cavs

Kumin NBA Finals-ah season hmasa lama intawng Golden State Warriors leh Cleveland Cavaliers kan hmu leh ngei dawn niin a lang ta. Western Conference Finals lamah Golden State hian San Antonio Spurs paltlang turin match khat bak chak an ngai tawh lo a, Eastern Conference Finals-ah champion lai Cleveland hian Boston Celtics lakah 2-0 in hma an hruai tawh bawk a ni.

Nimin zing inkhelah Golden State hian Spurs lakah 120-108 in hnehna an chang a, series-ah 3-0 in hma an hruai. Warriors tan hian Kevin Durant chuan point 33 a score bakah rebound vawi 10 lain double double a nei.

Stephen Curry chuan Warriors tana post season bika point score hnem ber dinhmun luah turin point 21 a nei a, playoff a khelh tawh zawng zawngah point 1,795 a neihna niin an club record chelhtu Rick Barry (1,776points) a khum.

Warriors hian tun season playoff-ah hneh loh an la tawng lo a, Game 3-a hnehna an chan chiah khan NBA team zinga playoff match hmasa 11-a hnehna chang vek thei team pathumna an ni.

American guard Curry chuan, "Vawi 11 kan chak hian min barakhaih lo, a chhan chun kan inkhelh apiangin hnehna chan tuma kan beih vang a ni. Spurs hi an beidawng ve ngai lo a, kan inkhelh hmabak turah kan fimkhur a ngai hle ang," a ti. Thawhlehni zing dar 6:30-ah Game 4 an khel ang.

Zirtawpni zing inkhelah Cleveland chuan Boston Celtics 130-86 in an hneh a, series-ah 2-0 in hma an hruai - Tukin dar 6:00 khan Game 3 an khel zui ve leh nghal a ni.

Cleveland Cavaliers hian quarter hnih an khelh zawh chuan 72-31 zetin hma an hruai fal tawh a, NBA playoff chanchinah half time-a hma hruai fal nasa ber an ni.

Cleveland coach Tyronn Lue chuan, "Minute 48 chhung ṭha zetin kan khel, court chhunga an awm chhung khan ka naute khan duhthusama ṭhain hun an hmang a ni," tiin a sawi.