CSS sum pe chhuak vek turin hriattir ; Kan sum dinhmun a harsat phah rih dawn - Finance Commissioner

Finance commissioner Vanlalchhuanga chuan, sorkar laipuiin centrally sponsored scheme (CSS) hnuaia March 31, 2022 hma lama sum an pek (release) tawhte chu a dawngtu tur department-te account (SNA)-ah July 20, 2022 hmaa pe chhuak vek turin state sorkarte a hriattir thu a sawi a, "Kan sum dinhmun a harsat phah rih dawn," a ti.

Vanglaini palaiin a kawmnaah Finance Commissioner chuan, CSS sum sorkar laipuiin pe mah se, Financial Rules-in sum hman nghal tur ni lo chu draw (lak chhuah) a phal loh avang leh department-in sum tam tham tak an account-a rei tak kawl phal a nih loh avangin RBI-a state account-ah dah ṭhin a nih thu a sawi a, "Hna an thawh zawha bill siam huna release ṭhin a ni," a ti. CSS sumte chu hman nghal ngai a nih loh avangin revenue expenditure atan hman pûk cháng a awm fo thu a sawi.

CSS sum revenue expenditure atana hman pûk chu kal dan ṭhin pangngai nia sawiin Vanlalchhuanga chuan, "Nikum aṭangin sorkar laipuiin public financial system thar kalpuiin, July 1, 2022 aṭangin RBI-a state account aṭanga sum chhuak zawng zawng central-in an hmu thei tawh. CSS sumte chu ni 21 chhungin department account-ah pe chhuak zel tawh turin state-te min hriattir a, procedure hrang hrang a tam avangin ni 21 chhung chuan a har deuh mai thei," a ti.

Finance Commissioner chuan, sorkar laipui chu an fîr (strict) thar hle tih sawiin, "Ministry of Finance chuan March 31, 2022 chin hma lama CSS sum release zawng zawng chu July 20, 2022 hma release vek tur leh release hman loh a awm a nih chuan pawh lêt a nih tur thu July 12, 2022-a state Finance secretary-te nena meeting-ah an sawi a, hriattirna pawh an siam," a ti a; CSS sum eng emaw zat chu RBI-a state account-ah a awm mek thu a sawi.

July 20, 2022 hmaa CSS sumte department account-a pe hman vek turin theihtawp an chhuah nia sawiin Vanlalchhuanga chuan, "Overdraft invèn a ngai bawk si a, CSS sum release mah ila, overdraft lo turin theihtawp kan chhuah. Hei vang hian, CSS sum ni lo chu tun hnaiah chuan kan chhuah mang lo. Manipur leh Nagaland-te chuan overdraft an pawisa lem lo a, an overdraft fo thu an Finance secretary-te'n an sawi a, chuvanga fimkhur loh ve kher tur erawh a ni lo," a ti.

Vanlalchhuanga chuan, CSS sum pek chhuah vek a nih chuan Mizoram sorkar sum dinhmun a harsat phah ngei tur thu sawiin, "CSS sum kan release chuan kan dinhmun dik tak a lang chhuak dawn a, kan inenkawl thiam a pawimawh zual dawn. Kan sum hmuh tur a chiang dawn a, kan sum hmuh angte a hmanna tur ruahman thiam a pawimawh ang. Vawi leh khata state thawh chhuah tihpun hluai a harsa si," a ti a; lak luh leh sum hman a inmil loh lutuk chuan Sri Lanka dinhmun anga din a hlauhawm tih a sawi.

Finance Commissioner sawi danin, CSS sum chu tun hma aṭangin sum dinhmunin a zir loh deuhin revenue expenditure atan pûk a ni ṭhin a, a hnuah rulh leh ṭhin a ni. Sorkar laipui kalphung tharah chuan, CSS sum chu revenue expenditure atan laklawh thilah pawh pûk theih a ni dawn tawh lo a, thawh chhuah nei tam lo state tan a buaithlak phah dawn a ni.