NHM-a thawkte'n nawrh an titàwp

19th July, 2022

National Health Mission (NHM) hnuaia thawkte'n tiam chin awm loa nawrh an kalpui chu nimin zing dar 9 khan an titawp a, nimin khan hna an chhunzawm nghal.

NHM hnuaia thawkte nawrh chungchangah hian Central YMA chuan palai hna an thawk a, July 17, Pathianni tlai khan deputy chief minister Tawnluia, Health minister Dr R Lalthangliana leh hotu dangte kâwmin, NHM-a thawkte nawrh chungchang an sawipui.

Sorkar hotute'n NHM-a thawkte thil phûtah hmalak nghal a nih tur thu CYMA hruaitute hnenah an lo sawi avangin NHM Employees Union, Mizoram (NEUM) chuan nawrh an titàwp a ni.

NEUM chuan nawrh an kalpui chungchangah rawtna an siam a, chu'ngte chu - Study Group report September 2022 chhunga tihpuitlin te, thla tin a hun taka hlawh lâk leh Mizoram Essential Service Maintenance Act 1990 (MESMA) puan khum tawh lohte a ni.

CYMA hruaitute leh sorkar hotute inbiakna chungchang chu NEUM Executive Committee chuan Pathianni zan dar 8:30 khan an ngaihtuah a, "Palaite thusawi aṭang hian sorkar hian NEUM rawtna hi min pawmpuiah kan ngai a, Mizoram sorkar hian Health department tana theihtawp kan chhuah ṭhinte hi min hriatpui ve se, hamṭhatna kan neihte pawh min tihhlawhtlinsak thuai zel turin kan ngen a ni," an ti.

CYMA LEH SORKAR HOTUTE INBIAKNA
STUDY GROUP: Dy CM Tawnluia'n Study Group chu chak taka hmalak a nih thu te, a chhuah hun sawi theih a ni lo a, September thla hma emaw, hnu emaw a ni thei a, a hma thei ang bera tihchhuah tum a ni tih thu a sawi.
HLAWH: HFW minister Dr R Lalthangliana'n HFW department-in regular taka hlawh pek an nih theih nan hmalak a ni a, June thla hlawh tur pawh peih a nih tawh thu leh, regular taka hlawh an lâk theih nan ruahmanna siam mek a ni tih thu a sawi.
MESMA: MESMA chu Covid-19 boruak a nih vanga chhuak a ni a, NEUM nawrh vanga chhuah a nih loh thu leh nawrh hmain Covid-19 a pun leh avanga tihchhuah tura file awm sa a nih thu HFW Minister-in a sawi a, MESMA chu Covid-19 bik atana tihchhuah a nih angin, notification siamṭhat a nih tur thu a sawi bawk.
SHOW CAUSE NOTICE: CYMA hruaitute'n show cause notice chungchang an sawi lang. NEUM member-te'n nawrh an titawp a nih chuan show cause notification sût nghal a nih tur thu Dy CM-in a sawi.