President thlanga vote thlâk a ni

Nimin khan India President thar tur thlanna atan India ram pumah MP leh MLA-te'n vote an thlak a, Mizoramah chuan Assembly House building-ah MLA-te'n vote an thlak.

President thlannaah hian chawhma dar 10 aṭangin vote thlâk theih a ni a; ZPM MLA Lalchhuanthanga'n vote thlâk hmasa berin, MNF member Dr K Pachhunga'n a thlak hnuhnung bera, chawhnu dar 1:15 velah a thlak a, ani hi BJP kaihhruai NDA candidate Droupadi Murmu election agent a ni.

Vote hi chawhnu dar 1:15-ah thlâk zawh ni mah se, vote thlak theih hun tàwp, tlai dar 5-ah polling station khâr a ni.

Mizoram MP pahnih, Lok Sabha MP C Lalrosanga leh Rajya Sabha MP K Vanlalvena te chuan MP dangte rualin Parliament House-ah vote an thlâk thung.

Vote thlâkna ballot box hi Delhi-ah thlawhtheihnain phurh thlâk a ni dawn a, state dang MLA leh MP-te vote nen a rualin July 21, 2022- khian Parliament House, New Delhi-ah chhiar a ni ang.

President thlannaah hian MLA pakhatin vote 8 zel an nei a, MP pakhatin vote 700 an nei thung. Mizoramin President thlannaa vote a neih zawng zawng chu MP pahnih vote 1,400 leh MLA 40-te vote 320, a vaiin vote 1,720 a ni.

Tarlan tawh ṭhin angin, President thlan turah hian candidate pahnih an awm a, NDA candidate Droupadi Murmu leh eptu party ṭhenkhatte thlàwp Yaswant Sinha te an ni a; MNF member-te chuan NDA candidate an vote a, eptu MLA-te chuan Yaswant Sinha an vote nia thu dawn a ni.