ASF zangnadawmna buaipui mek a ni

Vawk pûl hri, African Swine Fever (ASF) vanga kum 2021-a vawk thi neitute hnena zángnadawmna, 'Rehabilitation of victims of ASF' pek a nih theih nan AH&Vety department chuan Planning department-ah Rs 10,02,51,000 dilna a thehlut.

Hetih lai hian, ASF vanga vawk suat neitute hnena zángnadawmna pek tur Rs 10,48,42,200 chu Aizawl South Treasury-in a pek chhuah hun AH&Vety department chuan an nghak mek.

RTI Act hmanga zawhna AH&Vety department SPIO Dr Lalnghinglova, deputy director-in a chhan danin, ASF vanga vawk thi (vawk suat ni lo) neitute tana zangnadawmna dilna chu AH&Vety department chuan Mizoram sorkara Planning & Programme Implementation-ah an thehlut. Planning deputy adviser Chingthanmawi Guite aṭangin March 7, 2022 khan chhanna an dawng a, vawk thi neitute tana zangnadawmna (Rehabilitation of victims of ASF) pek tur chu State's Shelf of Project for further Examination-ah dah a nih thu tarlan a ni.

Hetih lai hian, ASF vanga vawk suat neitute hnena zangnadawmna pek tur Rs 10,48,42,200 chu AH&Vety department chuan bill siamin, July 13, 2022 khan Aizawl South Treasury-ah an thehlut a, Treasuty-in a pek hun an nghak mek.

AH&Vety department hotute chuan, Treasury-in sum a pek chhuah thuai an beisei thu Vanglaini an hrilh a, "Treasury-in AH&Vety department hnenah sum a pek chhuah veleh district hrang hranga zangnadawmna dawng turte bank account-ah an awmna district hotute kaltlangin pek chhuah a ni ang," an ti.

Tarlan tawh angin, kum 2021 khan Aizawl district-a chhungkaw 1,058, Lunglei district-ah 220, Siaha district-ah 50, Serchhip district-ah 744, Mamit district-ah 220, Saitual district-ah 56 leh Hnahthial district-ah 140, an vaiin chhungkaw 2,488-te vawk 12,568 suat a ni a, chu'ng mite hnena zangnadawmna pek tur chu Rs 10,48,42,200 a ni.