Mizorama lung (heart) zai vawi khatna

Mizorama a vawi khatna atan July 16, 2022 (Inrinni) khan lung (heart) zai a ni a, Trinity Hospital, Aizawlah hlawhtling takin open heart surgery tih a ni. July 17, Pathianni khan mi dang pahnih zai leh a ni bawk.

Trinity Hospital General Manager tarlan danin, Trinity Hospital-ah hian July 16, 2022 khan cardio-thoracic and vascular surgeon Dr Rahul Chandola, cardiac surgeon Dr OP Sinha, cardiac anaesthetist Dr Jitendra Chauhan, perfusionist Dr Avinash leh Delhi aṭanga an rawn hruai nurse team-te'n lung natna nei mipa kum 59 mi an zai a ni. Hlawhtling takin coronary artery by-pass graft (CABG) an ti a, darkar li chuang khawihin, lunga thisen dáwt ping thlak nan hmun pathumah thisen dâwt an vuah (by-pass) a ni.

Dr Rahul Chandola chuan, damlo chu a lung châwmtu thisen dáwt eng emaw zat ping, dinhmun hlauhthawnawm taka awm a nih thu leh a lung hnathawh dan pawh 25% vel chauh a nih thu a sawi a; an zai hnuah a dinhmun a ziaawm hle nia a hmuh thu a sawi bawk. Lung zai hi ICU-ah enkawl nghal a ni a, damdawi-in aṭanga chhuahtir a nih hma chuan a zaitu medical team hian an vil dawn a ni.

Trinity Hospital director Dr Lalrintluanga Jahau chuan, hun rei tawh tak aṭanga an lo tum leh suangtuah, Mizoram ngeia lung zai theih a ni ta chu Pathian hruaina liau liau nia a hriat thu a sawi a; lung zai a nih theih nan Cardio Thoracic Laboratory an din bakah, heart bypass surgery atana khawl pawimawh hrang hrang tun hnai khan an bun thar thu leh inzaina man pawh phai lam aia a tlàwm zawk theih thu a sawi bawk.