Hlawh leh bill pe turin sorkar beisei

BJP, Mizoram Pradesh president Vanlalhmuaka chuan, Mizorama centrally sponsored scheme hnuaia thawkte’n hlawh chungchangah harsatna an tâwk chu pawi a tih thu sawiin, Mizoram NHM hnuaia thawk hlawh leh PMGSY hnuaia contractor-te bill táng Mizoram sorkarin a pek thuai an beisei thu a sawi.

Nimina BJP pisaa inkhawmah thu sawiin Vanlalhmuaka chuan, PM scheme hrang hrang kaltlangin miretheite’n lei rem an rah theih nan nasa takin hma an la tih a sawi a, "Mizorama CSS kaltlanga hnathawkte'n hlawhah harsatna an tâwk mek a, a pawi hle. Central hian hlawh leh PMGSY kaltlanga kawng laihte a ba ngai lo a, mawhphurtute chu sorkarna chelh mektute an nih avangin, NHM hnuaia thawkte leh PMGSY kaltlanga contractor sum tángte kan sorkar hian an pek thuai kan beisei," a ti.

BJP President chuan, mipuiin thil nihna dik tak an hriat Mizoram sorkarin a hlauh thu sawiin, "Keini chuan mipui, miretheite’n an hamṭhatna tur an dawn theihna turin an hriat loh hrilhfiah kan tum thung. Mizoramah miretheite'n kan chanvo kan chan theihna turin kan harh a hun tawh," a ti a; Congress party leh party dangte’n BJP an hlauhawm anga mipui an sawiṭhaih ṭhin mah se, BJP chuan inkhawm lo tur leh Hindu-a inlet turin mi an sàwm ngai loh thu a sawi bawk.