MPYCC-in NHM-te chungchangah CM-ah ultimatum an thehlut

Mizoram Pradesh Youth Congress Committee (MPYCC) chuan National Health Mission (NHM) hnuaia thawkte thil phût chungchangah nimin khan Chief Minister hnenah ultimatum an thehlut a; hma la tura sorkar intiamnate chu an en zui reng dawn thu an tarlang.

MPYCC hruaitute chu an treasurer Ngurdingpuia Pachuau hoin Chief Minister's Office-ah an kal a; NHM hnuaia thawkte thil phût tihhlawhtlinsak tur leh Central YMA palaina anga NHM Employees Union Mizoram (NEUM) leh sorkar inremna chu a taka a hlawhtlin ngei an phûtna lehkha an thehlut a ni. Lehkhaah hian MPYCC general secretary HP Lalchuailova'n hming a ziak.

Congress ṭhalaite chuan, NEUM rawtna - Study Group report chungchang, a hun taka hlawh lâk, MESMA hlih leh show cause notice hlih chungchangah, "Hma an lak nghal tur thu sorkarin NEUM leh sorkar inkara palai CYMA hnena a sawi hi a takin a thleng em tih kan lo en zui ve reng dawn a ni," an ti.

MPYCC hian, Chief Minister hnena June 20, 2022-a an thlen tawh tarlang telin, "July 20, 2022 hma ngeia Mizoram Health Care Society chungchanga point panga kan tarlan mipui hmaa min puanzarsak leh tifel ngei tura kan phûtna kha kan rawn hriat nawntir che a ni," an ti a; Millennium Centre-a grape wine zuartu Lalhriatpuii (L), Dawrpui Vengthar thihna avanga zangnadawmna cheng nuai 100 pe tura an phût chungchang an ziak bawk.