Thu dik lo thehdarh nasa deuh political party an awm - Vanlalzawma

MNF vice president Vanlalzawma chuan nimin khan Mizo Hnam Rûna inkhawmah thu sawiin, thu dik lo thehdarh nasa deuh political party an awm niin a sawi.

Vanlalzawma chuan, miin social media an hmang nasa tawh a, awm hmun leh mut hmun aṭang pawhin politics a khelh theih tawh nia sawiin, "Internet khawvelah kan chêng tawh a, tute emaw party-in thu tawi têtê hmangin thu dik lo thehdarhna kawngah ṭan an la nasa tawh em em a, an thu post hi mipuite'n thu dik zîktluak a ni em tih kan hriat chian a pawimawh," a ti.

MNF party chu an thawhho ṭhat zel a pawimawh thu sawiin Vanlalzawma chuan, "Kan thawhhona a ṭhat a, theihtawpa kan ṭan tlàn chuan kan tlin lohna chhan tur a awm lo," a ti a; an hruaitu hmasate'n thih ngam lu púin, chaw ei hman loin theihtawpin ram leh hnam tan an bei a, chu'ngte chu an zui zel dawn tih a sawi.

MNF Vice President chuan, MNF party mite chu an nihnaah chiang tur leh party zahpui lo tura chahin, "Kawng engkimah mite'n min hriat nalh nalh theih tura kan awm a pawimawh Kan hnathawh pawh party ṭhenkhat hmalak aiin a ṭhatzia hmuh tur tam tak a awm tur a ni. Contract leh hnathawh ringawt beisei lo a, MNF tana ding a, Pathian leh kan ram tan theihtawpin ṭan kan la ang a, mipui duhsaknain kan tlin leh ngei ka ring," a ti.